ಕುಡಿದ ಅಮಲಿನಲ್ಲಿ ಪತಿಯಿಂದ ಪತ್ನಿಯ ಕೊಲೆ

ಕುಡಿದ ಅಮಲಿನಲ್ಲಿ ಪತಿಯು ರಾಡ್ನಿಂದ ತಲೆಗೆ ಹೊಡೆದು ಪತ್ನಿಯನ್ನ ಕೊಂದ ಘಟನೆ ತಾಲ್ಲೂಕಿನ ಹಂಡಿಗನಾಳ ಗ್ರಾಮದಲ್ಲಿ ಬುಧವಾರ ರಾತ್ರಿ ನಡೆದಿದೆ.
ಮಮತಾ (30) ಪತಿಯಿಂದಲೇ ಕೊಲೆಯಾದ ದುರ್ಧೈವಿ. ಗಂಜಿಗುಂಟೆ ಗ್ರಾಮದ ಮುನಿರಾಜುವಿನಿಂದ ಈ ಕೃತ್ಯ ನಡೆದಿದ್ದು, ಗ್ರಾಮಾಂತರ ಪೊಲೀಸರು ಮುನಿರಾಜುನನ್ನು ಬಂಧಿಸಿದ್ದಾರೆ. ಇವರಿಗೆ ಆರು ವರ್ಷದ ಗಂಡು ಮಗು ಮತ್ತು 9 ವರ್ಷದ ಹೆಣ್ಣು ಮಗುವಿದೆ. ಶಿಡ್ಲಘಟ್ಟ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ.
ಹಂಡಿಗನಾಳ ಮೂಲದ ಮಮತಾಳನ್ನು ಗಂಜಿಗುಂಟೆ ಗ್ರಾಮದ ಮುನಿರಾಜುವಿಗೆ ವಿವಾಹ ಮಾಡಿಕೊಡಲಾಗಿತ್ತು. ಕುಡಿದು ಕಾಟ ಕೊಡುತ್ತಿದ್ದ ಹಿನ್ನೆಲೆಯಲ್ಲಿ ಮಮತಾ ತನ್ನ ತವರುಮನೆಗೆ ಮಕ್ಕಳೊಂದಿಗೆ ಬಂದಿದ್ದಾರೆ. ಕಳೆದ ಮೂರು ತಿಂಗಳಿನಿಂದ ಹಂಡಿಗನಾಳಕ್ಕೇ ಬಂದು ಹೆಂಡತಿಯೊಂದಿಗೆ ನೆಲೆಸಿದ್ದ ಮುನಿರಾಜು ಬುಧವಾರ ರಾತ್ರಿ ಕುಡಿದು ಬಂದು ಹಣಕ್ಕಾಗಿ ಹೆಂಡತಿಯನ್ನು ಪೀಡಿಸಿದ್ದಾನೆ. ನಂತರ ಹೆಂಡತಿಗೆ ಹೊಡೆಯುವ ಮೂಲಕ ಕೊಲೆಗೈದಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.