Bashettahalli Hobli, Sidlaghatta Taluk, Chikkaballapur District : ಚಿತ್ರಾವತಿ ನದಿ ತಟದಲ್ಲಿ, ನಲ್ಲರಾಳ್ಳಹಳ್ಳಿ ಗ್ರಾಮದ ಬಳಿ ಇರುವ ರಾಮಲಿಂಗೇಶ್ವರ ಬೆಟ್ಟದ ಮೇಲೆ ನೆಲೆಸಿರುವ ಶ್ರೀ ರಾಮಲಿಂಗೇಶ್ವರಸ್ವಾಮಿ ದೇವಾಲಯ ಶಿಡ್ಲಘಟ್ಟ ತಾಲ್ಲೂಕಿನ ಪುರಾತನ ಹಾಗೂ ಪ್ರಸಿದ್ಧ ಪ್ರವಾಸಿ-ಧಾರ್ಮಿಕ ಕ್ಷೇತ್ರಗಳಲ್ಲಿ ಒಂದು. ಪ್ರತಿ ವರ್ಷ ಜನವರಿಯಲ್ಲಿ (ಪುಷ್ಯ ಶುಕ್ಲ ಪಕ್ಷದ ಚಂದ್ರಮಾನ ದಿನದಂದು) ನಡೆಯುವ ಬ್ರಹ್ಮರಥೋತ್ಸವಕ್ಕೆ ಸುತ್ತಮುತ್ತಲಿನ ಹಲವು ಜಿಲ್ಲೆಗಳಿಂದ ಸಾವಿರಾರು ಭಕ್ತರು ಆಗಮಿಸುತ್ತಾರೆ.
ಪೌರಾಣಿಕ ಹಿನ್ನೆಲೆ
ರಾಮ ಮತ್ತು ಈಶ್ವರ ಒಂದೆಡೆ ನೆಲೆಸಿರುವ ಅಪರೂಪದ ಕ್ಷೇತ್ರಗಳಲ್ಲಿ ಇದೂ ಒಂದು ಎಂಬ ನಂಬಿಕೆಯಿದೆ. ಶ್ರೀರಾಮ ವನವಾಸ ಕಾಲದಲ್ಲಿ ಪೂಜಿಸಲೆಂದು ಸ್ಥಾಪಿಸಿದ್ದ ಇಷ್ಟಲಿಂಗವಿರುವ ಕ್ಷೇತ್ರ ಇದು ಎಂದು ಸ್ಥಳೀಯರು ಹೇಳುತ್ತಾರೆ. ದೇವಾಲಯದಲ್ಲಿ ಚೋಳರ ಕಾಲದ ಕೆತ್ತನೆಗಳುಳ್ಳ ಶಿಲ್ಪಗಳಿದ್ದು, ನೂರಾರು ವರ್ಷಗಳ ಇತಿಹಾಸಕ್ಕೆ ಸಾಕ್ಷಿಯಾಗಿವೆ.
ಬೆಟ್ಟದ ವಿಶೇಷತೆಗಳು
- ಸಾಕಷ್ಟು ದೂರಕ್ಕೇ ಕಾಣುವ ಅತಿ ಎತ್ತರವಾದ ಧ್ವಜಸ್ತಂಭ ಮತ್ತು ದೊಡ್ಡದಾದ ಏಕಶಿಲಾ ಬಸವಣ್ಣ
- ಬೇರೆಲ್ಲಿಯೂ ಕಾಣಸಿಗದ ಹನುಮಲಿಂಗ ದೇವಾಲಯ
- ರಾಮದೊಣೆ, ಲಕ್ಷ್ಮಣದೊಣೆ, ಸೀತಾದೊಣೆ ಎಂಬ ಸದಾ ನೀರು ತುಂಬಿರುವ ಮೂರು ನೀರಿನ ಸೆಲೆಗಳು — ರಾಮ ನಿರ್ಮಿಸಿದ್ದನೆಂಬ ಪ್ರತೀತಿ
- ಬೆಟ್ಟದ ಮೇಲಿನಿಂದ ಕಾಣುವ ವಿಶಾಲ ಪ್ರಕೃತಿ ನೋಟ ಹಾಗೂ ಪ್ರಶಾಂತ ವಾತಾವರಣ
ಬ್ರಹ್ಮರಥೋತ್ಸವ ಮತ್ತು ದನಗಳ ಜಾತ್ರೆ
ಪ್ರತಿ ವರ್ಷ ಜನವರಿಯಲ್ಲಿ ನಡೆಯುವ ಬ್ರಹ್ಮರಥೋತ್ಸವದ ಸಂದರ್ಭದಲ್ಲಿ ಸ್ವಾಮಿಗೆ ಹೂವಿನ ಅಲಂಕಾರ, ಮಹಾ ಮಂಗಳಾರತಿ ನಡೆದು, ಭಾಗವಹಿಸುವ ಎಲ್ಲ ಭಕ್ತರಿಗೂ ಸಾಮೂಹಿಕ ಅನ್ನ ಸಂತರ್ಪಣೆ ವ್ಯವಸ್ಥೆ ಇರುತ್ತದೆ. ರಥೋತ್ಸವದ ಜೊತೆಗೆ ಹಲವು ದಿನಗಳ ಕಾಲ ಸಾಂಪ್ರದಾಯಿಕ ದನಗಳ ಜಾತ್ರೆ (ಪರಿಷೆ) ನಡೆಯುತ್ತದೆ. ಇದಕ್ಕೆ ಹಾಸನ, ಬಳ್ಳಾರಿ, ದಾವಣಗೆರೆ, ಶಿವಮೊಗ್ಗ, ಚಿಕ್ಕಮಗಳೂರು ಸೇರಿದಂತೆ ದೂರದೂರುಗಳಿಂದ ರಾಸುಗಳನ್ನು ಕೊಳ್ಳಲು ಮತ್ತು ಮಾರಾಟಮಾಡಲು ಜನ ಆಗಮಿಸುತ್ತಾರೆ. ಪರಿಷೆಯಲ್ಲಿ ಬರಗು ಬತಾಸು, ಮೈಸೂರು ಪಾಕು, ಜಿಲೇಬಿಯಂತಹ ಸಿಹಿ ತಿಂಡಿ ಅಂಗಡಿಗಳು, ಬಿಸಿ ಬೋಂಡ, ಐಸ್ ಕ್ರೀಂ ಸೇರಿ ಹತ್ತಾರು ಅಂಗಡಿಗಳು ತಲೆ ಎತ್ತುತ್ತವೆ.
ದೇವಾಲಯ ಮುಜರಾಯಿ ವ್ಯಾಪ್ತಿಗೆ ಸೇರಿದ್ದರೂ, ರಥೋತ್ಸವದ ನಿರ್ವಹಣೆಯನ್ನು ದೇವಾಲಯ ಕನ್ವೀನರ್ ಸುನೀತಾ ಶ್ರೀನಿವಾಸರೆಡ್ಡಿ ಕುಟುಂಬ ಹಲವು ವರ್ಷಗಳಿಂದ ನಡೆಸಿಕೊಂಡು ಬರುತ್ತಿದೆ. ಅಮೆರಿಕೆಯಲ್ಲಿ ನೆಲೆಸಿರುವ, ಈ ಭಾಗದ ಮೂಲದ ದುರ್ಗಂ ಚಾರಿಟೆಬಲ್ ಟ್ರಸ್ಟ್ ದೇವಾಲಯದ ಕಾಂಪೌಂಡ್ ನಿರ್ಮಾಣ, ವಿದ್ಯುತ್ ದೀಪಗಳು ಮತ್ತು ಸೋಲಾರ್ ವಿದ್ಯುತ್ ಘಟಕಕ್ಕೆ ನೆರವು ನೀಡಿದೆ.
ದಾರಿ ಹೇಗೆ ಸಾಗುವುದು?
ಗೂಗಲ್ ಮ್ಯಾಪ್ನಲ್ಲಿ ದಾರಿ ವೀಕ್ಷಿಸಿ / Get Directions on Google Maps
ಪ್ರವಾಸಿಗರಿಗೆ ಸಲಹೆ
ಬೆಟ್ಟ ಹತ್ತಲು ಮೆಟ್ಟಿಲುಗಳ ವ್ಯವಸ್ಥೆ ಇದ್ದು, ಬೆಳಿಗ್ಗೆ ಅಥವಾ ಸಂಜೆ ವೇಳೆಯಲ್ಲಿ ಭೇಟಿ ನೀಡುವುದು ಉತ್ತಮ. ಬ್ರಹ್ಮರಥೋತ್ಸವದ ದಿನಗಳಂದು ಭಾರೀ ಜನಸಂದಣಿ ಇರುವುದರಿಂದ, ಶಾಂತ ವಾತಾವರಣ ಬಯಸುವವರು ಬೇರೆ ದಿನ ಭೇಟಿ ನೀಡಬಹುದು.
ಶಿಡ್ಲಘಟ್ಟ ತಾಲ್ಲೂಕಿನ ಇನ್ನೊಂದು ಪ್ರವಾಸಿ ತಾಣ ಕುಂದಲಗುರ್ಕಿ ಬೆಟ್ಟದ ಶ್ರೀ ವರದಾಂಜನೇಯಸ್ವಾಮಿ ದೇವಾಲಯ ಕುರಿತ ವಿವರವನ್ನೂ ನೋಡಿ.
In English: Sri Ramalingeshwaraswamy Temple sits atop Ramalingeshwara hill near Nallarallahalli village in Bashettahalli hobli, on the banks of the Chitravathi river. Local legend ties it to Rama’s exile-period worship of Shiva, and the temple has Chola-era carvings. Distinctive features include a tall flagpole, a monolithic Basavanna statue, a rare Hanumalinga shrine, and three perennial water springs (Ramadone, Lakshmanadone, Seetadone) believed to have been created by Rama. The annual Brahmarathotsava each January draws thousands of devotees along with a traditional multi-day cattle fair.
