ಹಂಡಿಗನಾಳ ಎಂ.ಪಿ.ಸಿ.ಎಸ್ ಕಟ್ಟಡಕ್ಕೆ ೨೫ ಲಕ್ಷ ರೂ; ಶಾಸಕ ವಿ.ಮುನಿಯಪ್ಪ ಭರವಸೆ

ತಾಲ್ಲೂಕಿನ ಹಂಡಿಗನಾಳದ ಹಾಲು ಉತ್ಪಾದಕರ ಮಹಿಳಾ ಸಹಕಾರ ಸಂಘದ ಕಟ್ಟಡಕ್ಕೆ ಗುದ್ದಲಿಪೂಜೆಯನ್ನು ಭಾನುವಾರ ನೆರವೇರಿಸಿ ಶಾಸಕ ವಿ.ಮುನಿಯಪ್ಪ ಮಾತನಾಡಿದರು.
ಹಾಲು ಉತ್ಪಾದಕರ ಮಹಿಳಾ ಸಹಕಾರ ಸಂಘವು ಚೆನ್ನಾಗಿ ಕಾರ್ಯನಿರ್ವಹಿಸಿ ೪೫ ಲಕ್ಷ ರೂಗಳನ್ನು ಉಳಿತಾಯ ಮಾಡಿದ್ದಾರೆ. ಶಾಸಕರ ಅನುದಾನದಿಂದ ೨೫ ಲಕ್ಷರೂಗಳನ್ನು ಸುಸಜ್ಜಿತ ಕಟ್ಟಡ ನಿರ್ಮಾಣಕ್ಕಾಗಿ ನೀಡುತ್ತೇನೆ ಎಂದು ಅವರು ಭರವಸೆ ನೀಡಿದರು.
ಹೆಣ್ಣುಮಕ್ಕಳೇ ನಡೆಸುವ ಸಹಕಾರ ಸಂಘಗಳು ಯಶಸ್ವಿಯಾಗಿವೆ. ಅದಕ್ಕೆ ಉದಾಹರಣೆಯಾಗಿ ಹಂಡಿಗನಾಳದ ಹಾಲು ಉತ್ಪಾದಕರ ಮಹಿಳಾ ಸಹಕಾರ ಸಂಘದವರು ಅತ್ಯುತ್ತಮವಾಗಿ ಸಂಘವನ್ನು ನಡೆಸಿಕೊಂಡು ಇತರರಿಗೆ ಮಾದರಿಯೆನಿಸಿದ್ದಾರೆ. ಸುಮಾರು ೭೫ ಲಕ್ಷ ರೂ ವೆಚ್ಚದಲ್ಲಿ ಅತ್ಯುತ್ತಮ ಕಟ್ಟಡವನ್ನು ಕಟ್ಟಲು ಹೊರಟಿರುವುದು ಅಭಿನಂದನೀಯ. ಅವರು ಉಳಿತಾಯ ಮಾಡಿರುವ ಹಣದ ಜೊತೆಗೆ ನನ್ನ ನಿಧಿಯಿಂದ ೨೫ ಲಕ್ಷ ರೂ ನೀಡುತ್ತೇನೆ. ಕೆ.ಎಂ.ಎಫ್ ಹಾಗೂ ಕೋಚಿಮುಲ್ ನಿಂದ ತಲಾ ೩ ಲಕ್ಷ ರೂಗಳನ್ನು ನೀಡುವರು. ಗುಣಮಟ್ಟಕ್ಕೆ ರಾಜಿಯಾಗದೆ ದೂರದೃಷ್ಟಿಯಿಂದ ಸುಸಜ್ಜಿತ ಕಟ್ಟಡವನ್ನು ಕಟ್ಟಿ ಎಂದು ಹೇಳಿದರು.
ಹಾಲು ಉತ್ಪಾದಕರ ಮಹಿಳಾ ಸಹಕಾರ ಸಂಘದ ಅಧ್ಯಕ್ಷೆ ಸುಜಾತಮ್ಮ ನಾಗರಾಜು, ಕಾರ್ಯದರ್ಶಿ ರೂಪಮ್ಮ, ಸದಸ್ಯರಾದ ಬೈರಮ್ಮ, ವಿ.ಅನಿತಾ, ಪಾರಿಜಾತ, ಅನಿತಾ, ಚಿಕ್ಕಮ್ಮ, ವೆಂಕಟಲಕ್ಷ್ಮಮ್ಮ, ಮುನಿರತ್ನಮ್ಮ, ಜಯಮ್ಮ, ಮಂಜುಳಮ್ಮ, ಕೋಚಿಮುಲ್ ನಿರ್ದೇಶಕ ಶ್ರೀನಿವಾಸ್, ವಿಸ್ತರಣಾಧಿಕಾರಿ ಶ್ರೀನಿವಾಸ್, ಗುಲಾಬ್ ಜಾನ್, ಗ್ರಾಮ ಪಂಚಾಯಿತಿ ಸದಸ್ಯ ಜಯರಾಮ್, ವಿ.ನಾಗರಾಜು, ರಾಮಾಂಜಿನಪ್ಪ ಹಾಜರಿದ್ದರು.