ಹಳೆಯ ಮರವೊಂದನ್ನು ರಾತ್ರೋ ರಾತ್ರಿ ಕತ್ತರಿಸಿರುವ ದುಷ್ಕರ್ಮಿಗಳು

ನಗರದ ಬಸ್ ನಿಲ್ದಾಣದ ಬಳಿ ಹಳೆಯ ಮರವೊಂದನ್ನು ರಾತ್ರೋ ರಾತ್ರಿ ದುಷ್ಕರ್ಮಿಗಳು ಕತ್ತರಿಸಿದ್ದಾರೆ. ಈ ಬಗ್ಗೆ ಯಾವುದೇ ಅಧಿಕಾರಿಗಳು ಕ್ರಮ ಕೈಗೊಳ್ಳಲು ಮುಂದಾಗದಿರುವುದು ಹಲವಾರು ಅನುಮಾನಗಳಿಗೆ ಕಾರಣವಾಗಿದೆ ಎಂದು ಸ್ಥಳೀಯರು ಆರೋಪಿಸಿದ್ದಾರೆ.
ಸುಮಾರು ಮುವ್ವತ್ತು ವರ್ಷಗಳಿಂದ ಈ ಮರ ನೆರಳು ನೀಡುತ್ತಿತ್ತು. ಕೆಲವು ಜನಪ್ರತಿನಿಧಿಗಳ ಸಹಕಾರದಿಂದ ಸೇರಿ ಈ ಸ್ಥಳವನ್ನು ಆಕ್ರಮಿಸುವ ಹುನ್ನಾರದಿಂದ ಹಳೆಯ ಮರವನ್ನು ರಾತ್ರಿ ಕತ್ತರಿಸಿದ್ದಾರೆ. ಎಲ್ಲೆಡೆ ಪರಿಸರ ಉಳಿಸಿ, ಮರ ಬೆಳೆಸಿ ಎಂದು ಆಂದೋಲನ ನಡೆಸಿದ್ದರೆ, ನಮ್ಮಲ್ಲಿ ಜನನಿಬಿಡ ಪ್ರದೇಶದಲ್ಲಿ ಬಸ್ ನಿಲ್ದಾಣದ ಬಳಿ ಮರವನ್ನು ಕಡಿದರೂ ಇದುವರೆಗೂ ಅರಣ್ಯ ಇಲಾಖೆಯವರಾಗಲೀ ಅಥವಾ ನಗರಸಭೆಯವರಾಗಲೀ ಕ್ರಮ ಕೈಗೊಂಡಿಲ್ಲ. ಈ ಸ್ಥಳವನ್ನು ಆಕ್ರಮಿಸಲು ನಡೆಸಿರುವ ಹುನ್ನಾರವಿದು ಎಂದು ಸ್ಥಳೀಯ ಆಟೋ ಚಾಲಕರು, ವ್ಯಾಪಾರ ವಹಿವಾಟು ನಡೆಸುವವರು ದೂರಿದ್ದಾರೆ.
ಈ ಬಗ್ಗೆ ಅಧಿಕಾರಿಗಳು ಕ್ರಮ ಕೈಗೊಳ್ಳದಿದ್ದಲ್ಲಿ ಪ್ರತಿಭಟನೆ ನಡೆಸುವುದಾಗಿ ಎಚ್ಚರಿಸಿದ್ದಾರೆ.
ಅಪ್ಪು, ನಾರಾಯಣಸ್ವಾಮಿ, ಶಂಕರ, ರಾಜು, ಪ್ರಕಾಶ್, ಶಿವಣ್ಣ, ಅಶ್ವತ್ ಹಾಜರಿದ್ದರು.