ಗ್ರಾಮಗಳಲ್ಲಿ ಅಭಿವೃದ್ಧಿ ಕಾರ್ಯಗಳು ನಡೆಯುವಾಗ ಸರ್ಕಾರಿ ಯೋಜನೆಯ ಸದ್ಬಳಕೆಯ ಬಗ್ಗೆ ಜನರು ಕಾಳಜಿ ವಹಿಸಬೇಕು ಹಾಗೂ ಗುಣಮಟ್ಟದ ಬಗ್ಗೆ ಗಮನಿಸುತ್ತಿರಬೇಕು ಎಂದು ಶಾಸಕ ಎಂ.ರಾಜಣ್ಣ ತಿಳಿಸಿದರು.
ತಾಲ್ಲೂಕಿನ ಬೂದಾಳ ಮತ್ತು ವೀರಾಪುರ ಗ್ರಾಮಗಳು ಸೇರಿದಂತೆ ತಾಲ್ಲೂಕಿನ ವಿವಿಧ ಗ್ರಾಮಗಳಲ್ಲಿನ ಎಸ್.ಸಿ.ಪಿ.ಮತ್ತು ಎಸ್.ಟಿ.ಪಿ ಯೋಜನೆಯಡಿ ಲೊಕೋಪಯೋಗಿ ಇಲಾಖೆಯ ಸಿ.ಸಿ.ರಸ್ತೆ ಕಾಮಗಾರಿಗಳಿಗೆ ಬುಧವಾರ ಪೂಜೆ ಸಲ್ಲಿಸಿ ಅವರು ಮಾತನಾಡಿದರು.
ಲೊಕೋಪಯೋಗಿ ಇಲಾಖೆಯ ಮೂಲಕ ಎಸ್.ಸಿ.ಪಿ.ಮತ್ತು ಎಸ್.ಟಿ.ಪಿ ಯೋಜನೆಗಳಡಿಯಲ್ಲಿ ತಲಾ ೫ ಲಕ್ಷ ರೂಪಾಯಿಗಳ ವೆಚ್ಚದಲ್ಲಿ ೧೦ ಗ್ರಾಮಗಳಲ್ಲಿ ಸಿ.ಸಿ.ರಸ್ತೆಗಳನ್ನು ನಿರ್ಮಾಣ ಮಾಡಲು ಕಾಮಗಾರಿಗಳನ್ನು ಕೈಗೆತ್ತಿಕೊಳ್ಳಲಾಗಿದೆ. ಕೆಲವು ಹಳ್ಳಿಗಳಲ್ಲಿ ಈಗಾಗಲೇ ಕಾಮಗಾರಿಗಳು ಮುಕ್ತಾಯವಾಗಿವೆ. ಒಟ್ಟು ೫೦ ಲಕ್ಷ ರೂಪಾಯಿಗಳ ವೆಚ್ಚದಲ್ಲಿ ಕಾಮಗಾರಿಗೆ ಚಾಲನೆ ನೀಡಲಾಗಿದೆ.
ನಾಗರಿಕರು ಹಳ್ಳಿಗಳ ಅಭಿವೃದ್ಧಿ ಹಾಗೂ ಕುಡಿಯುವ ನೀರಿನ ವಿಚಾರಗಳಲ್ಲಿ ರಾಜಕೀಯವನ್ನು ಬೆರೆಸದೆ ಪಕ್ಷ ಬೇಧ ಮರೆತು ಸಹಕಾರ ನೀಡಬೇಕು. ಲಭ್ಯವಾಗುತ್ತಿರುವ ನೀರನ್ನು ಮಿತವಾಗಿ ಬಳಕೆ ಮಾಡುವುದರ ಜೊತೆಗೆ ಹಳ್ಳಿಗಳಲ್ಲಿ ಸ್ವಚ್ಚತೆಯನ್ನು ಕಾಪಾಡುವ ಕಡೆಗೂ ಹೆಚ್ಚಿನ ಆಸಕ್ತಿವಹಿಸಿದಾಗ ಆರೋಗ್ಯವಂತ ಸಮಾಜವನ್ನು ನಿರ್ಮಾಣ ಮಾಡಲು ಸಾಧ್ಯವಾಗುತ್ತದೆ ಎಂದರು.
ಜಿಲ್ಲಾ ಪಂಚಾಯಿತಿ ಸದಸ್ಯ ಬಂಕ್ ಮುನಿಯಪ್ಪ, ಮುಖಂಡರಾದ ಮುನಿರೆಡ್ಡಿ, ಮಂಜುನಾಥ್, ಮಳ್ಳೂರಯ್ಯ ಮುಂತಾದವರು ಹಾಜರಿದ್ದರು.

ಬಯಲುಸೀಮೆಯ ನೀರಾವರಿ ಹೋರಾಟಕ್ಕೆ ಶಕ್ತಿ ತುಂಬಲು ಮತ್ತು ಪರಿಸರ, ಶಿಕ್ಷಣ, ಆರೋಗ್ಯ ಹಾಗು ಉದ್ಯೋಗ ಕ್ಷೇತ್ರದಲ್ಲಿ ಯುವಜನತೆಯನ್ನು ಹೆಚ್ಚಿನ ರೀತಿಯಲ್ಲಿ ತೊಡಗಿಸುವ ಉದ್ದೇಶದಿಂದ ಸ್ಥಾಪಿತವಾದ ಯುವಶಕ್ತಿ ಸಂಘಟನೆಯನ್ನು ವಿಸ್ತರಿಸುವ ಸಲುವಾಗಿ ಶನಿವಾರ ಶಿಡ್ಲಘಟ್ಟದ ನೂತನ ಪದಾಧಿಕಾರಿಗಳನ್ನು ಆಯ್ಕೆ ಮಾಡಿ ಪಟ್ಟಿ ಬಿಡುಗಡೆಗೊಳಿಸಲಾಯಿತು.
ಶಿಡ್ಲಘಟ್ಟ ತಾಲ್ಲೂಕು ಅಧ್ಯಕ್ಷರಾಗಿ ಟಿ.ಇ.ವಿಶ್ವನಾಥ, ಉಪಾಧ್ಯಕ್ಷರಾಗಿ ಎಂ.ಮಧು, ಪ್ರಧಾನ ಕಾರ್ಯದರ್ಶಿಯಾಗಿ ವಿ.ಎ.ಗಿರೀಶ್, ಜಂಟಿ ಕಾರ್ಯದರ್ಶಿಯಾಗಿ ಎ.ಶ್ರೀನಿವಾಸ್, ಸಂಘಟನಾ ಕಾರ್ಯದರ್ಶಿಯಾಗಿ ಕೆ.ಸುಧಾಕರ್, ಜಂಟಿ ಸಂಘಟನಾ ಕಾರ್ಯದರ್ಶಿಯಾಗಿ ಎಚ್.ಎನ್.ಮುನಿರಾಜು ರನ್ನು ಆಯ್ಕೆ ಮಾಡಲಾಯಿತು.
ನೂತನ ಪದಾಧಿಕಾರಿಗಳನ್ನುದ್ದೇಶಿಸಿ ಯುವಶಕ್ತಿಯ ರಾಜ್ಯಾಧ್ಯಕ್ಷ ಶಿವಪ್ರಕಾಶ್‌ರೆಡ್ಡಿ ಮಾತನಾಡಿ ಬಯಲುಸೀಮೆ ಜಿಲ್ಲೆಗಳ ಜ್ವಲಂತ ಸಮಸ್ಯೆಗಳಾದ ಶಾಶ್ವತ ನೀರಾವರಿ ಸೇರಿದಂತೆ ಪರಿಸರ ಸಂರಕ್ಷಣೆಗಾಗಿ ಹೋರಾಡುವುದೇ ಯುವಶಕ್ತಿ ಸಂಘಟನೆಯ ಪದಾಧಿಕಾರಿಗಳ ಧ್ಯೇಯವಾಗಬೇಕೆಂದರು.
ಈ ಸಂದರ್ಭದಲ್ಲಿ ರಾಜ್ಯ ಉಪಾಧ್ಯಕ್ಷ ವಿಜಯಬಾವರೆಡ್ಡಿ, ರಾಜ್ಯ ಜಂಟಿ ಕಾರ್ಯದರ್ಶಿ ಬಿ.ವಿ.ರಾಘವೇಂದ್ರ, ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಎನ್.ಪಿ.ನಾಗಭೂಷಣ, ಎಂ.ಕೆ.ಸುನಿಲ್‌ಕುಮಾರ್, ಆರ್.ನವೀನ್, ಎನ್.ಎ.ನರಸಿಂಹಮೂರ್ತಿ ಮತ್ತಿತರರು ಹಾಜರಿದ್ದರು.

ಮಹಿಳೆಯರು ಕೌಟುಂಬಿಕ ನಿರ್ವಹಣೆಯ ಜವಾಬ್ದಾರಿಯಿಂದ ಸದಾ ಒತ್ತಡದಲ್ಲಿರುತ್ತಾರೆ. ಅವರಲ್ಲಿರುವ ಪ್ರತಿಭೆಯನ್ನು ಪ್ರದರ್ಶಿಸಲು ಸೂಕ್ತ ಅವಕಾಶ ಸಿಗಬೇಕು ಎಂದು ಜಿಲ್ಲಾ ಪಂಚಾಯಿತಿ ಸದಸ್ಯೆ ತನುಜಾ ರಘು ಹೇಳಿದರು.
ನಗರದ ನೆಹರು ಕ್ರೀಡಾಂಗಣದಲ್ಲಿ ಮಹಿಳಾ ಮತ್ತು ಮಕ್ಕಳ ಇಲಾಖೆ ಹಾಗು ಯುವ ಸಂಬಲೀಕರಣ ಇಲಾಖೆ ಚಿಕ್ಕಬಳ್ಳಾಪುರ ಇವರ ಸಂಯುಕ್ತ ಆಶ್ರಯದಲ್ಲಿ ಅಂತರ ರಾಷ್ಟ್ರೀಯ ಮಹಿಳಾ ದಿನಾಚರಣೆಯ ಅಂಗವಾಗಿ ಗುರುವಾರ ಮಹಿಳೆಯರಿಗಾಗಿ ಏರ್ಪಡಿಸಿದ್ದ ತಾಲ್ಲೂಕು ಮಟ್ಟದ ಕ್ರೀಡಾಕೂಟದ ಉದ್ಘಾಟನೆ ನೆರವೇರಿಸಿ ಮಾತನಾಡಿದರು.

ಸರ್ಕಾರಿ ಶಾಲೆಗಳನ್ನು ಉಳಿಸಿ ಬೆಳೆಸುವಂತಹ ಮುಖ್ಯ ಜವಾಬ್ದಾರಿ ಶಿಕ್ಷರು ಹಾಗೂ ಪೋಷಕರ ಮೇಲೆ ಇದೆ ಎಂದು ಕ್ಷೇತ್ರ ಶಿಕ್ಷಣಾಧಿಕಾರಿ ರಘನಾಥರೆಡ್ಡಿ ತಿಳಿಸಿದರು.
ನಗರದ ಸರ್ಕಾರಿ ಪದವಿ ಪೂರ್ವ ಕಾಲೇಜಿನ ಆವರಣದಲ್ಲಿ ಬುಧವಾರ ನಡೆದ ತಾಲ್ಲೂಕು ಮಟ್ಟದ ೨೦೧೬-೧೭ನೇ ಸಾಲಿನ ೧ನೇ ತರಗತಿಯಿಂದ ೭ನೇ ತರಗತಿಯ ವಿದ್ಯಾರ್ಥಿಗಳಿಗೆ ಸ್ಪಷ್ಟ ಓದು, ಶುದ್ಧ ಬರಹ, ಅಭಿವ್ಯಕ್ತಿ ಸ್ಪರ್ಧಾ ಮಾಸಚರಣೆ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.
ಸರ್ಕಾರಿ ಶಾಲೆಗಳಲ್ಲಿ ಉತ್ತಮ ಗುಣಮಟ್ಟದ ಶಿಕ್ಷಕರಿದ್ದಾರೆ. ಇನ್ನು ಹೆಚ್ಚಿನ ಗುಣಮಟ್ಟದ ಶಿಕ್ಷಣವನ್ನು ಮಕ್ಕಳಿಗೆ ನೀಡಿ, ಸರ್ಕಾರದಿಂದ ಮಕ್ಕಳ ವಿದ್ಯಾಭ್ಯಾಸಕ್ಕೆ ನೀಡುತ್ತಿರುವ ಸೌಲಭ್ಯಗಳನ್ನು ಸದುಪಯೋಗ ಪಡಿಸಿಕೊಳ್ಳಬೇಕು. ಮಕ್ಕಳ ಸಾಂಸ್ಕೃತಿಕ ಹಾಗೂ ಶೈಕ್ಷಣಿಕ ಚಟುವಟಿಕೆಗಳನ್ನು ಶಿಕ್ಷಕರು ಹಾಗೂ ಪೋಷಕರು ಗಮನಿಸುತ್ತಿರಬೇಕು. ಖಾಸಗಿ ಶಾಲೆಗಳ ವ್ಯಾಮೋಹಕ್ಕೆ ಒಳಗಾಗಿರುವ ಪೋಷಕರು ತಮ್ಮ ಮಕ್ಕಳನ್ನು ಸರ್ಕಾರಿ ಶಾಲೆಗಳಿಗೆ ಕಳೆಸಿ ಸರ್ಕಾರದಿಂದ ನೀಡುತ್ತಿರುವ ಸೌಲಭ್ಯಗಳನ್ನು ಪಡೆದು ಸರ್ಕಾರಿ ಶಾಲೆಗಳನ್ನು ಉಳಿಸುವ ನಿಟ್ಟಿನಲ್ಲಿ ಸಹಕರಿಸುವ ಜೋತೆಗೆ ವಿದ್ಯಾರ್ಥಿಗಳ ಜೀವನವನ್ನು ಉತ್ತಮ ರೀತಿಯಲ್ಲಿ ರೂಪಿಸಬಹುದು ಎಂದು ಹೇಳಿದರು.
೧ನೇ ತರಗತಿಯಿಂದ ೭ನೇ ತರಗತಿಯ ತಾಲ್ಲೂಕಿನ ಎಲ್ಲಾ ಶಾಲಾ ಮಕ್ಕಳು ಶಿಕ್ಷಕರು ಹಾಗೂ ಸಿಆರ್‌ಪಿಗಳು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.
ಶಿಕ್ಷಕರಾದ ಸುಮ, ಮಂಜುಳಾ, ವೆಂಕಟೇಶ್, ರಂಗನಾಥ್, ಶ್ರೀರಾಮಯ್ಯ, ಬಿ.ವಿ.ನಾರಾಯಣಸ್ವಾಮಿ, ಮುನಿಯಪ್ಪ, ಸುದರ್ಶನ್, ಮುನಿರಾಜು, ಚಂದ್ರಶೇಖರ್ ಮುಂತಾದವರು ಈ ಸಂದರ್ಭದಲ್ಲಿ ಹಾಜರಿದ್ದರು.

ಪ್ರಕೃತಿಯಲ್ಲಿ ವಿವಿಧ ಮಾಲಿನ್ಯಗಳಿರುವಂತೆ ಭಾಷೆಯ ಬೆಳವಣಿಗೆಗೆ ಕುಂಠಿತಪ್ರಾಯವಾಗುವ ನಡೆ, ನುಡಿ, ಲಿಪಿ ಮಾಲಿನ್ಯಗಳಿಂದ ವಿದ್ಯಾರ್ಥಿಗಳು ದೂರವಾಗಬೇಕು. ವಿದ್ಯಾರ್ಥಿ ದಿಸೆಯಲ್ಲಿಯೇ ಭಾಷೆಯನ್ನು ಬೆಳೆಸುವ ಹಾಗೂ ಸ್ಪಷ್ಟ ಉಚ್ಛಾರಣೆಯ ಬಗ್ಗೆ ತಿಳಿದುಕೊಳ್ಳಬೇಕು ಎಂದು ಕನ್ನಡ ಸಂಸ್ಕೃತಿ ಸೇವಾ ಭಾರತಿ ಸಂಸ್ಥಾಪಕ ಅಧ್ಯಕ್ಷ ಓಂಕಾರಪ್ರಿಯ ತಿಳಿಸಿದರು.
ನಗರದ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಮಂಗಳವಾರ ವಿಶ್ವ ಮಾತೃ ಭಾಷಾ ದಿನದ ಅಂಗವಾಗಿ ‘ಕನ್ನಡ ಪದ ಸಂಪತ್ತು’ ಎಂಬ ವಿಷಯವಾಗಿ ನಡೆದ ಉಪನ್ಯಾಸ ಕಮ್ಮಟದಲ್ಲಿ ಉಪನ್ಯಾಸಕರಾಗಿ ಆಗಮಿಸಿ ಅವರು ಮಾತನಾಡಿದರು.
ಸಮಯದ ಉಪಯುಕ್ತತೆ, ಭಾಷೆಯ ಹಾಗೂ ಬರವಣಿಗೆಯ ಶ್ರೇಷ್ಠತೆ, ಕನ್ನಡ ಸರಳ ಪದಗಳಲ್ಲಿನ ವಿಶೇಷ ಅರ್ಥ ಶ್ರೀಮಂತಿಕೆ, ನಡೆ ನುಡಿ ಲಿಪಿ ಮಾಲಿನ್ಯಗಳಿಂದುಂಟಾಗುವ ಅನರ್ಥಗಳನ್ನು, ಕನ್ನಡ ಪದ ಸಂಪತ್ತಿನ ಹಿರಿಮೆಯನ್ನು ಮತ್ತು ನಿಜ ಸಂಸ್ಕೃತಿಯನ್ನು ವಿದ್ಯಾರ್ಥಿಗಳು ತಿಳಿಯಬೇಕು.
ಹುಟ್ಟಿದರೆ ಕನ್ನಡ ನಾಡಲ್ಲಿ ಹುಟ್ಟಬೇಕೆಂದಿರುವ ಗೀತೆಯ ಮೋಡಿಗಿಂತ, ಕನ್ನಡ ನಾಡಿನಲ್ಲಿ ಹುಟ್ಟಿದರೆ ಸರ್ವಮಾನ್ಯ ಕನ್ನಡಿಗರಾಗುವ ದಿಸೆಯಲ್ಲಿ ಪಟ್ಟಭದ್ರರು, ಸ್ವಯಂಘೋಷ ಚಕ್ರವರ್ತಿಗಳು ನಮ್ಮನ್ನು ಬಿಟ್ಟರೆ ಕನ್ನಡವಿಲ್ಲವೆಂದು ಅನ್ಯಭಾಷೆಯನ್ನು ಅನ್ಯ ಭಾಷಿಕರನ್ನೂ ಅನವಶ್ಯಕ ದೂಷಿಸುವುದು ಬಿಟ್ಟು ಈ ನಾಡಿನಲ್ಲಿ ಹುಟ್ಟಿ ನಾವೇನು ನಿಜವಾಗಿ ತೊಟ್ಟಿದ್ದೇವೆ. ಈಗಿನ – ಮುಂದಿನ ಯುವ ಪೀಳಿಗೆಗೆ ಏನು ಕೊಟ್ಟಿದ್ದೇವೆ ಮುಖ್ಯವಾಗಿ ಏನು ಮರೆತುಬಿಟ್ಟಿದ್ದೇವೆ ಎಂಬುದನ್ನು ಯೋಚಿಸಬೇಕಾಗಿದೆ ಎಂದರು.
ಕನ್ನಡ ಭಾಷೆ ಕೇವಲ ಭಾಷೆಯಾಗಿ ಮಾತ್ರ ಉಳಿಯುವುದಲ್ಲ ಅದು ನೀತಿಯಾಗಿ, ರೀತಿಯಾಗಿ, ಪದ್ಧತಿಯಾಗಿ, ಸಿದ್ಧತೆಯಾಗಿ ಹಾಗೂ ಬದ್ಧತೆಯಾಗಿ ಇಡೀ ಸಂಸ್ಕೃತಿಯನ್ನುಳಿಸಿ ಬೆಳೆಸುವ, ಹಿರಿಮೆ-ಗರಿಮೆಗಳ ಪರಿಚಯಿಸುವ ಸತ್ಯ ಸಾಕ್ಷಾತ್ಕಾರವಾಗಿಸುವ ಅದ್ಭುತ ಸೆಲೆ ಕಲೆ ನೆಲೆ ಸದಾ ಜೀವನ್ಮುಖಿ ಅಲೆಯಾಗಿಯೂ ಪ್ರವಾಹಿಸಬೇಕಾಗಿದೆ.
ಭಾಷೆ ನಡೆ ಮಾಲಿನ್ಯ, ನುಡಿ ಮಾಲಿನ್ಯದಿಂದ ಕಲಸುಮೇಲೊಗರ ಪ್ರಯೋಗವಾಗದೇ, ಮಡಿವಂತಿಕೆಯಿಂದ ಮುಳುಗದೇ, ಹೃದಯ ಶ್ರೀಮಂತಿಕೆಯಿಂದ ಮೊಳಗಬೇಕಾಗಿದೆ ಬೆಳಗಬೇಕಾಗಿದೆ. ಭಾಷೆಯು ಸಾಂಪ್ರದಾಯ, ಸಂಸ್ಕೃತಿಯಾಗಿ ಮತ್ತಷ್ಟು ಶ್ರೀಮಂತವಾಗಬೇಕೇ ವಿನಃ, ವಿಕೃತಿಯಿಂದ ನಿಜ ಆಕೃತಿಗೆ ಧಕ್ಕೆಯಾಗದಂತಿರಬೇಕು. ಆಚರಿಸುವ ಆಚರಣೆಗಳೂ ವಿವೇಚನೆಯೊಂದಿಗೆ ಅನುಕರಣೀಯ ಕ್ರಿಯೆಯಾಗಬೇಕು. ಭಾಷೆ ಎಂಬುದು ಆಷಾಢಭೂತಿ ಭಾಷಣವಾಗದೇ, ಸರ್ವಾಲಂಕೃತ ಭೂಷಣವಾಗಬೇಕು. ನುಡಿದರೆ ಮುತ್ತಿನ ಹಾರ, ನಡೆದರೆ ಸಂಸ್ಕೃತಿ ಸಾರ, ಮುಡಿದರೆ ಧನ್ಯತೆಯ ಭಾವ, ಹರಡಿದರೆ ಶ್ರೀಗಂಧದ ಸೌರಭವಾಗಿ ಈ ನೆಲದ ವಾಸಿಗರೆಲ್ಲರೂ ವ್ಯಕ್ತಿಗತ ಭೇದ ಬದಿಗಿಟ್ಟು ಅಹುದಹುದೆನ್ನಬೇಕು ಎಂದು ನುಡಿದರು.
ಈ ಸಂದರ್ಭದಲ್ಲಿ ದುಶ್ಚಟಗಳಿಂದ ದೂರವಿರುವುದಾಗಿ ವಿದ್ಯಾರ್ಥಿಗಳಿಂದ ಪ್ರತಿಜ್ಞೆಯನ್ನು ಮಾಡಿಸಿದರು.
ಪ್ರಾಂಶುಪಾಲ ಪ್ರೊ.ಚಂದ್ರಾನಾಯಕ್‌, ಉಪನ್ಯಾಸಕರಾದ ಉಮೇಶ್‌ರೆಡ್ಡಿ, ಬಿ.ಕೆ.ರವಿ, ಕೆ.ಎನ್‌.ವೆಂಕಟಾಚಾರಿ, ರಾಮಚಂದ್ರಪ್ಪ, ಯತಿರಾಜುಲು ನಾಯ್ಡು, ಚಾಯಣ್ಣ ಮತ್ತಿತರರು ಹಾಜರಿದ್ದರು.

ಹುಂಡಿಯಲ್ಲಿ, ಮನೆಯಲ್ಲಿ ೧೦ ರೂ ನಾಣ್ಯಗಳನ್ನು ಶೇಖರಿಸಿದ್ದವರ ಮೊಗದಲ್ಲಿ ಆತಂಕ
ಹತ್ತು ರೂಪಾಯಿಯ ನಾಣ್ಯ ಚಲಾವಣೆ ರದ್ದಾಗಿದೆಯಂತೆ ಎಂಬ ಅಂತೆ ಕಂತೆಗಳಿಂದ ಅಂಗಡಿ ಮುಂಗಟ್ಟು ಹೋಟೆಲ್, ಮುಂತಾದ ವ್ಯಾಪಾರ ವಹಿವಾಟುಗಳಲ್ಲಿ ನಾಣ್ಯ ಚಲಾವಣೆ ಸ್ಥಗಿತಗೊಂಡಿದೆ. ೧೦ ರೂಪಾಯಿಯ ನಾಣ್ಯದ ಚಲಾವಣೆ ರದ್ದಾಗಿದೆ ಎಂಬ ವದಂತಿಗಳು ಜನರಲ್ಲಿ ಇನ್ನಿಲ್ಲದ ಆತಂಕಕ್ಕೆ ಕಾರಣವಾಗಿದೆ.
೨೦೦೦ನೇ ಇಸವಿಯಿಂದಲೂ ಈ ವರ್ಷದಲ್ಲೂ ಮುದ್ರಣವಾದ ೧೦ ರೂಪಾಯಿಯ ನಾಣ್ಯಗಳು ಇತರೆ ನಾಣ್ಯಗಳ ಜತೆ ಜತೆಗೆ ಚಲಾವಣೆಯಲ್ಲಿ ಇದ್ದು ಚಿಲ್ಲರೆ ಸಮಸ್ಯೆಯನ್ನು ನೀಗಿಸುವಲ್ಲಿ ತನ್ನದೇ ಆದ ಪಾತ್ರವಹಿಸಿತ್ತು. ಜತೆಗೆ ನಾಣ್ಯ ಸಂಗ್ರಹದ ಹವ್ಯಾಸ ಇರುವವರ ಬಳಿಯಲ್ಲದೆ, ಮಹಿಳೆಯರು ಕೂಡಿಟ್ಟ, ಹುಂಡಿಯಲ್ಲಿ ಹಾಕಿದ ನಾಣ್ಯಗಳೆ ಹೆಚ್ಚಿನ ಸಂಖ್ಯೆಯಲ್ಲಿವೆ.
ಅದರಲ್ಲೂ ವರಮಹಾಲಕ್ಷ್ಮಿ ಹಬ್ಬದಲ್ಲಿ ನಗ ನಗದು ಇಡುವ ಸಂಪ್ರದಾಯ ಇದ್ದು ವರಮಹಾಲಕ್ಷ್ಮಿ ಹಬ್ಬಕ್ಕಾಗಿಯೆ ಬಹುತೇಕ ಮಂದಿ ೧೦, ೫, ೨ ಹಾಗೂ ೧ ರೂಪಾಯಿಯ ನಾಣ್ಯಗಳನ್ನು ಶೇಖರಿಸಿಕೊಂಡಿದ್ದು ಅವರೆಲ್ಲರೂ ಇದೀಗ ಆತಂಕಕ್ಕೆ ಒಳಗಾಗಿದ್ದಾರೆ.
೧೦ ರೂಪಾಯಿಗಳ ನಾಣ್ಯ ಚಲಾವಣೆ ರದ್ದಾಗಿದೆಯಂತೆ, ೧೦ ರೂಪಾಯಿಯ ನಕಲಿ ನಾಣ್ಯಗಳು ಚಲಾವಣೆಗೆ ಬಂದಿರುವುದರಿಂದ ನಾಣ್ಯಗಳ ಚಲಾವಣೆಯಲ್ಲಿ ರದ್ದುಪಡಿಸಲಾಗಿದೆಯಂತೆ, ಐದುನೂರು ಸಾವಿರ ರೂಪಾಯಿ ನೋಟು ರದ್ದುಪಡಿಸಿದಂತೆ ಇದೀಗ ೧೦ ರೂ ನಾಣ್ಯವನ್ನು ರದ್ದುಪಡಿಸಿದೆಯಂತೆ. ಹೀಗೆ ಹತ್ತು ಹಲವು ರೀತಿಯ ವದಂತಿಗಳು ಜನರ ಮದ್ಯೆ ಹರಿದಾಡತೊಡಗಿವೆ.
ಯಾವ ನಾಣ್ಯದಲ್ಲಿ ರೂ ಚಿನ್ಹೆ ಇಲ್ಲವೋ ಆ ನಾಣ್ಯ ಚಲಾವಣೆ ಇಲ್ಲ ಎಂದು ಕೆಲವರ ವಾದವಾದರೆ, ನಾಣ್ಯದಲ್ಲಿ ೧೦ ಗೆರೆಗಳು ಇರುವ ನಾಣ್ಯವಷ್ಟೆ ಚಲಾವಣೆಯಾಗಲಿದೆ ಎನ್ನುವುದು ಇನ್ನು ಕೆಲವರ ವಾದವಾಗಿದೆ.
ಇಷ್ಟೆ ಅಲ್ಲದೆ ನಾಣ್ಯದಲ್ಲಿ ಇರುವ ಚಿನ್ನದ ಹಾಗೂ ಬೆಳ್ಳಿ ಬಣ್ಣಗಳ ನಡುವಿನ ತೆಳುವಾದ ಗೆರೆಯ ಮೇಲೆ ೧೦ ರೂಪಾಯಿಯ ಸಂಖ್ಯೆ ಮುದ್ರಿತವಾಗಿರುವ ನಾಣ್ಯವಷ್ಟೆ ಅಸಲಿ, ೧೦ ರೂ ಸಂಖ್ಯೆ ನಾಣ್ಯದ ಮದ್ಯೆ ಇದ್ದರೆ ಅದು ನಕಲಿಯಂತೆ, ಹೀಗೆ ನಾಣ್ಯದ ಅಸಲಿ ನಕಲಿಯ ಮಾತುಗಳ ಚರ್ಚೆ ಜೋರಾಗಿ ಸಾಗಿದೆ.
ಈ ಅಂತೆ ಕಂತೆಗಳ ನಡುವೆ ಎಲ್ಲರೂ ತಮ್ಮ ಬಳಿ ಇರುವ ೧೦ ರೂ ನಾಣ್ಯಗಳನ್ನು ಯಾರಿಗಾದರೂ ಕೊಟ್ಟು ಕೈ ತೊಳೆದುಕೊಂಡು ಬಿಡುವ ದಾವಂತದಲ್ಲಿ ಇದ್ದರೆ, ಯಾರೇ ಕೊಟ್ಟರೂ ೧೦ ರೂ ನಾಣ್ಯ ಸ್ವೀಕರಿಸಲು ಉಳಿದವರು ಸಿದ್ದರಿಲ್ಲ.
ಹಾಗಾಗಿ ಯಾವುದೆ ಅಂಗಡಿ ಮುಂಗಟ್ಟು ಹೋಟೆಲ್ ಮುಂತಾದೆಡೆ ಎಲ್ಲೂ ೧೦ ರೂಪಾಯಿಯ ನಾಣ್ಯದ ಚಲಾವಣೆ ಸಂಪೂರ್ಣವಾಗಿ ಸ್ಥಗಿತಗೊಂಡು ಈಗಾಗಲೆ ಇದ್ದ ಚಿಲ್ಲರೆ ಸಮಸ್ಯೆ ಇನ್ನಷ್ಟು ಬಿಗಡಾಯಿಸಿದೆ.
ಐದುನೂರು, ಸಾವಿರ ರೂ ನೋಟಿನ ಚಲಾವಣೆ ಅಮಾನ್ಯತೆ ಆದಾಗ, ಆ ನಂತರ ಜನ ಸಾಮಾನ್ಯರಲ್ಲಿ ಮನೆ ಮಾಡಿದ್ದ ಆತಂಕ ದಿನ ಕಳೆದಂತೆ ದೂರವಾಗುತ್ತಿರುವ ಈ ಸಮಯದಲ್ಲಿ ೧೦ ರೂ ನಾಣ್ಯದ ಚಲಾವಣೆ ರದ್ದು ಎಂಬ ವದಂತಿ ಮತ್ತೆ ಸಮಸ್ಯೆ, ಆತಂಕವನ್ನು ತಂದೊಡ್ಡಿದೆ.
ಈ ವದಂತಿಗಳಿಂದ ಕಂಗಾಲಾದ ಮಹಿಳೆಯರು ತಮ್ಮ ಬಳಿ ಇರುವ ೧೦ ರೂ ನಾಣ್ಯ, ಹುಂಡಿಯಲ್ಲಿನ ನಾಣ್ಯಗಳನ್ನು ಮಹಿಳಾ ಸ್ವ ಸಹಾಯ ಸಂಘಗಳ ಉಳಿತಾಯದ ಹಣಕ್ಕೆ ಹೊಂದಿಸಿ ಬ್ಯಾಂಕ್‌ಗೆ ಪಾವತಿಸಲು ಮುಂದಾಗುತ್ತಿದ್ದಾರೆ. ಇದರಿಂದಾಗಿ ಕಳೆದ ಐದಾರು ದಿನಗಳಿಂದಲೂ ಬ್ಯಾಂಕ್‌ಗೆ ಹಣ ಕಟ್ಟಲು ಬರುತ್ತಿರುವ ಮಹಿಳಾ ಸ್ವ ಸಹಾಯ ಸಂಘಗಳ ಪ್ರತಿನಿಗಳ ಬಹುತೇಕ ಮಂದಿ ೧೦ ರೂ ನಾಣ್ಯಗಳನ್ನೆ ತರುತ್ತಿರುವುದು ಬ್ಯಾಂಕ್‌ನವರಿಗೂ ತಲೆ ನೋವಾಗಿದೆ.
‘೧೦ ರೂ ಅಥವಾ ಯಾವುದೆ ನಾಣ್ಯದ ಚಲಾವಣೆಯನ್ನು ಆರ್‌ಬಿಐ ರದ್ದುಪಡಿಸಿಲ್ಲ. ಚಲಾವಣೆಯಲ್ಲಿ ಇರುವ ಎಲ್ಲ ನಾಣ್ಯಗಳು ಎಂದಿನಂತೆ ಚಲಾವಣೆಯಲ್ಲಿವೆ. ಯಾರೋ ಇಂತಹ ವದಂತಿಯನ್ನು ಹರಿದು ಬಿಟ್ಟಿದ್ದು ನಮ್ಮ ಬ್ಯಾಂಕ್‌ಗೂ ಕಳೆದ ಐದಾರು ದಿನಗಳಿಂದಲೂ ೧೦ ರೂ ನಾಣ್ಯಗಳನ್ನು ತಂದು ಕಟ್ಟುವವರ ಸಂಖ್ಯೆ ಹೆಚ್ಚುತ್ತಿದೆ. ಇದರಿಂದ ನಮಗೆ ಬ್ಯಾಂಕ್‌ನ ಇತರೆ ಹಣಕಾಸುವ ವಹಿವಾಟಿಗೆ ಅಡಚಣೆಯಾಗುವಷ್ಟರ ಮಟ್ಟಿಗೆ ೧೦ ರೂ ನಾಣ್ಯಗಳನ್ನು ತಂದು ಕಟ್ಟುವವರ ಸಂಖ್ಯೆ ಹೆಚ್ಚುತ್ತಲೆ ಇದೆ, ನಾವು ನಾಣ್ಯಗಳನ್ನು ಎಂದಿನಂತೆ ಕಟ್ಟಿಸಿಕೊಳ್ಳುತ್ತೇವೆ. ಜತೆಗೆ ಜನ ಸಾಮಾನ್ಯರೂ ಸಹ ಯಾವುದೆ ಅಂಜಿಕೆ ಅಳುಕಿಲ್ಲದೆ ೧೦ ರೂ ನಾಣ್ಯವನ್ನು ಚಲಾವಣೆ ಮಾಡಬಹುದು’ ಎಂದು ಎಸ್‌ಬಿಎಂ ವ್ಯವಸ್ಥಾಪಕಿ ಎನ್.ಹೇಮಲತಾ ತಿಳಿಸಿದರು.