ನಗರಸಭೆಯ ಉದ್ಯಾನವನದಲ್ಲಿ ಶನಿವಾರ ಎರಡು ತಲೆಮಾರಿನ ವಿಶೇಷ ಸಂಗಮ, ನಗು, ಸಂತೋಷ, ಉಲ್ಲಾಸ, ಉತ್ಸಾಹ, ಸಂಭ್ರಮ, ಕೇಕೆ ತುಂಬಿಕೊಂಡಿತ್ತು. ನಳನಳಿಸುವ ಹಸುರಿನ ಗಿಡಮರಗಳ ನಡುವೆ ಪುಟ್ಟ ಮಕ್ಕಳ ರಚನೆಯ ವರ್ಣರಂಜಿತ ಚಿತ್ತಾರಗಳ ತೋರಣ ಸ್ವಾಗತಿಸುತ್ತಿತ್ತು.
ವಿನೂತನ ‘ಅಜ್ಜಿ ತಾತಂದಿರ ದಿನ’ವನ್ನು ನಗರದ ಚಿಂತಾಮಣಿ ರಸ್ತೆಯಲ್ಲಿರುವ ನಗರಸಭೆ ಉದ್ಯಾನವನದಲ್ಲಿ ಡಾಲ್ಫಿನ್ ಪಬ್ಲಿಕ್ ಶಾಲೆಯ ಎಲ್.ಕೆ.ಜಿ. ಹಾಗೂ ಯು.ಕೆ.ಜಿ ಮಕ್ಕಳು ಆಚರಿಸಿದರು.
ಮೊಮ್ಮಕ್ಕಳೊಂದಿಗೆ ಬಂದಿದ್ದ ಅಜ್ಜಅಜ್ಜಿಯರಿಗೆ ಈ ಸಂದರ್ಭದಲ್ಲಿ ಹಲವಾರು ವಿನೋದಮಯ ಕ್ರೀಡೆಗಳನ್ನು ಆಯೋಜಿಸಲಾಗಿತ್ತು. ಮೊಮ್ಮಕ್ಕಳ ಹಾಡು, ನೃತ್ಯ, ಆಟಗಳನ್ನು ಕಂಡು, ಅವರೊಂದಿಗೆ ಉದ್ಯಾನದಲ್ಲಿ ಆಡಿ ನಲಿಯುವ ಮೂಲಕ ಅಜ್ಜಅಜ್ಜಿಯರು ಭಾವುಕರಾದರು. ಸ್ಪರ್ಧೆಗಳಲ್ಲಿ ಗೆದ್ದವರಿಗೆ ಕಥೆ ಪುಸ್ತಕಗಳನ್ನು ಬಹುಮಾನವಾಗಿ ನೀಡಿ ಮಕ್ಕಳಿಗೆ ಕಥೆ ಹೇಳುವಂತೆ ಕೋರಲಾಯಿತು.
ಡಾಲ್ಫಿನ್ ವಿದ್ಯಾಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕ ಅಶೋಕ್ ಮಾತನಾಡಿ, ‘ಅಜ್ಜಿ-ತಾತಂದಿರ ಜೊತೆ ಮೊಮ್ಮಕ್ಕಳ ಸಂಬಂಧ ವಿಶೇಷವಾಗಿರುತ್ತೆ. ಪ್ರೀತಿ, ಅಕ್ಕರೆ ಜೊತೆ ಚಿಕ್ಕ ಚಿಕ್ಕ ಪಾಠಗಳನ್ನ ಕಥೆಗಳ ರೂಪದಲ್ಲಿ ಹೇಳಿಕೊಡುತ್ತಾರೆ. ಅಜ್ಜಿ-ತಾತ ಈ ವಯಸ್ಸಿನ ಕಷ್ಟಪಟ್ಟು ಕೆಲಸ ಮಾಡುವುದನ್ನು ಕಂಡು ಮಕ್ಕಳು ಶ್ರಮ ಮತ್ತು ಶಿಸ್ತು ಎಷ್ಟು ಮುಖ್ಯ ಅಂತ ಅರ್ಥ ಮಾಡಿಕೊಳ್ಳುತ್ತಾರೆ. ಹಣ್ಣೆಲೆ ಮತ್ತು ಹೊಸ ಚಿಗುರು ಒಂದೆಡೆ ಸೇರಿದಾಗ ಮಾತ್ರ ಬದುಕಿಗೆ ಪೂರ್ಣ ಅರ್ಥ ಸಿಗುತ್ತದೆ’ ಎಂದು ಹೇಳಿದರು.
ಈ ವಿನೂತನ ಕಾರ್ಯಕ್ರಮವನ್ನು ಆಯೋಜಿಸಿದ್ದ ಶಾಲೆಯವರಿಗೆ ಅಭಿನಂದನೆ ಸಲ್ಲಿಸಿದ ಹಿರಿಯರು,‘ಮೊಮ್ಮಕ್ಕಳ ಖುಷಿಯನ್ನು ನೋಡಿ ಆನಂದಿಸುವುದೇ ನಮ್ಮ ಜೀವನದ ಸಂಧ್ಯಾಕಾಲದ ಸುಂದರ ಘಳಿಗೆಗಳು. ಇಂತಹ ಕಾರ್ಯಕ್ರಮವನ್ನು ನಡೆಸುವ ಆಲೋಚನೆಯೇ ನಮಗೆ ಖುಷಿ ತಂದಿದೆ’ ಎಂದರು.
ಡಾಲ್ಫಿನ್ ವಿದ್ಯಾಸಂಸ್ಥೆಯ ಆಡಳಿತಾಧಿಕಾರಿ ಚಂದನಾ ಅಶೋಕ್, ಪ್ರಾಂಶುಪಾಲ ಥಾಮಸ್ ಫಿಲಿಪ್, ರತ್ನಮ್ಮ, ಶಿಕ್ಷಕರು ಹಾಜರಿದ್ದರು.
