ಮೂರು ವರ್ಷಗಳ ನಂತರ ತುಂಬಿದ ಸಾದಲಿ ಹೊಸಕೆರೆ

ತಾಲ್ಲೂಕಿನಲ್ಲಿ ಬೀಳುತ್ತಿರುವ ಮಳೆಗೆ ಸಾದಲಿ ಮತ್ತು ಎಸ್.ದೇವಗಾನಹಳ್ಳಿಯ ಹಲವು ಕೆರೆಗಳು ತುಂಬಿ ಕೋಡಿ ಹರಿಯುತ್ತಿದ್ದು ಜನರು ಹರ್ಷಗೊಂಡಿದ್ದಾರೆ.
ಸಾದಲಿ ಹೊಸಕೆರೆಯು ಮೂರು ವರ್ಷದ ನಂತರ ತುಂಬಿ ಕೋಡಿ ಹರಿಯುತ್ತಿದೆ. ಸ್ಥಳೀಯರು ಕೆರೆಯ ದಂಡೆಯಲ್ಲಿರುವ ವೀರಗಲ್ಲಿಗೆ ಪೂಜೆಯನ್ನು ಸಲ್ಲಿಸಿದ್ದಾರೆ. ಇರಗಪ್ಪನಹಳ್ಳಿ ಬಳಿಯಿರುವ ಚಾಕಪ್ಪನಹಳ್ಳಿ ಕೆರೆ, ಇರಗಪ್ಪನಹಳ್ಳಿಯ ಬಸವನಕಟ್ಟೆಯ ಬಳಿಯ ಕೆರೆ, ಇರಗಪ್ಪನಹಳ್ಳಿ ಕ್ರಾಸ್ ಬಳಿಯಿರುವ ಕೆರೆ, ಇರಗಪ್ಪನಹಳ್ಳಿ ಗ್ರಾಮದಲ್ಲಿನ ಕೆರೆ, ಸೊಣ್ಣಗಾನಹಳ್ಳಿ ಕೆರೆ, ಗೊಲ್ಲಹಳ್ಳಿ ಕೆರೆ ತುಂಬಿ ಹರಿಯುತ್ತಿವೆ.
ತಾಲ್ಲೂಕಿನಲ್ಲಿಯೇ ಅತ್ಯಂತ ದೊಡ್ಡ ಕೆರೆಯೆಂದೇ ಪ್ರಸಿದ್ಧವಾದ ರಾಮಸಮುದ್ರ ಕೆರೆಯು ೧೨ ಅಡಿ ತುಂಬಿದ್ದು, ಇನ್ನೂ ೨೦ ಅಡಿ ತುಂಬಬೇಕಿದೆ. ಈ ಭಾಗದ ಕೆರೆಗಳೆಲ್ಲಾ ತುಂಬುತ್ತಿದ್ದಂತೆ ಕೋಡಿ ಹರಿದು ರಾಮಸಮುದ್ರ ಕೆರೆಯನ್ನು ನೀರು ಸೇರುತ್ತದೆ. ರಾಮಸಮುದ್ರ ಕೆರೆ ತುಂಬುವುದನ್ನು ಜನರು ಕಾಯುತ್ತಿದ್ದಾರೆ.