ನಗರದ ರೇಷ್ಮೆ ಗೂಡಿನ ಮಾರುಕಟ್ಟೆಯಲ್ಲಿ ಬುಧವಾರ ಸರಾಸರಿ ರೇಷ್ಮೆ ಗೂಡಿನ ಬೆಲೆಯು 410 ರೂಗಳಾಗುವುದರೊಂದಿಗೆ ದಾಖಲೆಯನ್ನು ಸೃಷ್ಟಿಸಿದೆ. ಇದುವರೆಗೂ ರೇಷ್ಮೆ ಗೂಡಿನ ಸರಾಸರಿ ಬೆಲೆ ಈ ಮಟ್ಟವನ್ನು ಮುಟ್ಟಿಯೇ ಇಲ್ಲವೆಂದು ಮಾರುಕಟ್ಟೆಯ ಉಪನಿರ್ದೇಶಕ ರತ್ನಯ್ಯಶೆಟ್ಟಿ ತಿಳಿಸಿದ್ದಾರೆ.
ಶಿಡ್ಲಘಟ್ಟದ ರೇಷ್ಮೆ ಗೂಡಿನ ಮಾರುಕಟ್ಟೆಯು ರಾಜ್ಯದಲ್ಲಿಯೇ ಅತಿ ದೊಡ್ಡದಿದ್ದು, ಹೆಚ್ಚಿನ ಬೆಲೆ ಸಿಗುವ ಕಾರಣ ದೂರದ ಆಂಧ್ರ ಹಾಗೂ ರಾಜ್ಯದ ಗಡಿ ಭಾಗಗಳಿಂದಲೂ ಇಲ್ಲಿ ಮಾರಲು ತಾವು ಬೆಳೆದ ರೇಷ್ಮೆ ಗೂಡುಗಳನ್ನು ರೈತರು ತರುತ್ತಾರೆ. ಆದರೆ ಈಚೆಗೆ ಮಾರುಕಟ್ಟೆಗೆ ಆಗಮಿಸುತ್ತಿರುವ ಗೂಡಿನ ಪ್ರಮಾಣದಲ್ಲಿ ಇಳಿಕೆಯಾಗಿರುವುದರಿಂದ ಗೂಡಿನ ಬೆಲೆಯು ಏರುತ್ತಾ ಸಾಗಿದೆ.
ಬುಧವಾರ ಮಾರುಕಟ್ಟೆಯಲ್ಲಿ ರೇಷ್ಮೆ ಗೂಡಿನ ಗರಿಷ್ಠ ಧಾರಣೆ 430, ಕನಿಷ್ಠ ಧಾರಣೆ 300 ಹಾಗೂ ಸರಾಸರಿ 410 ದಾಖಲಾಗಿದೆ. ಸಾಮಾನ್ಯವಾಗಿ 800 ರಿಂದ 1000 ಲಾಟ್ ಗೂಡು ಮಾರುಕಟ್ಟೆಗೆ ಸರಾಸರಿಯಾಗಿ ಬರುತ್ತದೆ. ಆದರೆ ಉಷ್ಣಾಂಶ ಏರಿಕೆ ಹಾಗೂ ನೀರಿನ ಅಭಾವದಿಂದಾಗಿ ಎಲ್ಲೆಡೆ ರೇಷ್ಮೆ ಬೆಳೆ ಸರಿಯಾಗಿ ಆಗಿಲ್ಲವಾದ್ದರಿಂದ ಮಾರುಕಟ್ಟೆಗೆ ಆಗಮಿಸುವ ಗೂಡಿನ ಪ್ರಮಾಣ 500 ಲಾಟ್ಗಳಿಗೆ ಇಳಿದಿದೆ. ಹಾಗಾಗಿ ಬೆಲೆ ಏರಿಕೆಯಾಗಿದೆ. ಈಗ ಮಳೆಯಾಗುತ್ತಿರುವುದರಿಂದ ಇನ್ನು ಹದಿನೈದು ದಿನಗಳಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಗೂಡು ಆಗಮಿಸುತ್ತದೆ. ಸರಾಸರಿ ಧಾರಣೆ ಕಡಿಮೆಯಾಗುತ್ತದೆ. ರೇಷ್ಮೆ ಬಿಚ್ಚಾಣಿಕೆದಾರರು ಕೆಲಸಗಾರರು ಬಿಟ್ಟು ಹೋದರೆ ಎಂಬ ಭಯದಿಂದ ಹಾಗೂ ತಮ್ಮ ಅಸಲು ಸಿಕ್ಕರೆ ಸಾಕು ಎಂಬ ಉದ್ದೇಶದಿಂದ ಲಾಭ ಬರದಿದ್ದರೂ ಹೆಚ್ಚಿನ ಬೆಲೆಗೆ ಗೂಡು ಕೊಳ್ಳುತ್ತಿದ್ದಾರೆ. ಇದು ತಾತ್ಕಾಲಿಕ ಸ್ಥಿತಿಯಷ್ಟೆ ಎಂದು ಅವರು ಹೇಳಿದರು.
