News

ಕಳಪೆ ಪೈಪ್ ಪೂರೈಕೆಗೆ ರೈತನ ಆಕ್ರೋಶ, ಕೃಷಿ ಇಲಾಖೆ ಎದುರು ಪೈಪ್ ಬಿಸಾಕಿ ಪ್ರತಿಭಟನೆ

Sidlaghatt Substandard Drip Irrigation Pipe Farmer Protest

Sidlaghatta : ಹನಿ ನೀರಾವರಿ ಪದ್ದತಿಯಡಿ ಕೃಷಿ ಇಲಾಖೆಯಿಂದ ವಿತರಿಸಲಾದ ಪೈಪ್ ಮತ್ತು ಲ್ಯಾಟರಲ್‌ಗಳು ಕಳಪೆಯಾಗಿದ್ದು, ಈ ಬಗ್ಗೆ ಸಂಬಂಧಿಸಿದ ಕಂಪನಿ ಮತ್ತು ಅಧಿಕಾರಿಗಳಿಗೆ ವಿಷಯ ತಿಳಿಸಿದರೂ ಯಾವುದೇ ಪ್ರಯೋಜನವಿಲ್ಲದ ಕಾರಣ, ರೈತನು ತನ್ನ ಆಕ್ರೋಶ ವ್ಯಕ್ತಪಡಿಸುತ್ತಾ ಪೈಪುಗಳನ್ನು ಕೃಷಿ ಇಲಾಖೆಯ ಸಹಾಯಕ ನಿರ್ದೇಶಕರ ಕಚೇರಿ ಮುಂಭಾಗ ಬಿಸಾಡಿದ್ದಾರೆ.

ಶಿಡ್ಲಘಟ್ಟ ತಾಲ್ಲೂಕಿನ ಅಪ್ಪೇಗೌಡನಹಳ್ಳಿಯ ರೈತ ಹಾಗೂ ತಾಲ್ಲೂಕು ಪಂಚಾಯಿತಿ ಮಾಜಿ ಅಧ್ಯಕ್ಷ ಕೆ. ಲಕ್ಷ್ಮಿನಾರಾಯಣರೆಡ್ಡಿ ಅವರು ತಮ್ಮ ತೋಟದಲ್ಲಿ ಹನಿ ನೀರಾವರಿಗಾಗಿ ಕೃಷಿ ಇಲಾಖೆಯಿಂದ ರಿಯಾಯಿತಿ ದರದಲ್ಲಿ ಪ್ರೀಮಿಯರ್ ಕಂಪನಿಯ ಪೈಪ್ ಮತ್ತು ಲ್ಯಾಟರಲ್‌ಗಳನ್ನು ಪಡೆದುಕೊಂಡಿದ್ದರು. ಆದರೆ ಅವುಗಳು ಸಂಪೂರ್ಣ ಕಳಪೆಯಾಗಿದ್ದು, ಜಾಯಿಂಟ್ ಸರಿಯಾಗಿ ಹೊಂದಾಣಿಕೆಯಾಗದೆ, ನೀರು ಒತ್ತಡದಲ್ಲಿ ಪೈಪ್‌ಗಳಿಂದ ಹೊರಬಿದ್ದು ಬೆಳೆ ಒಣಗಲು ಕಾರಣವಾಗಿದೆ.

ಈ ಕುರಿತು ಅವರು ಕೃಷಿ ಸಹಾಯಕ ನಿರ್ದೇಶಕ ರವಿ ಹಾಗೂ ಪೈಪ್ ಪೂರೈಕೆದಾರ ಕಂಪನಿಯ ಮುಖ್ಯಸ್ಥರಿಗೆ ದೂರು ನೀಡಿದಾಗ, ಸ್ಥಳಕ್ಕೆ ಆಗಮಿಸಿ ಪರಿಶೀಲನೆ ನಡೆಸಿದ ಅಧಿಕಾರಿಗಳು ಪೈಪ್‌ಗಳು ಕಳಪೆಯಾಗಿರುವುದನ್ನು ಒಪ್ಪಿಕೊಂಡು ಅವುಗಳನ್ನು ಬದಲಿಸುವ ಭರವಸೆ ನೀಡಿದ್ದರು. ಆದರೆ ದಿನಗಳು ಕಳೆದರೂ ಯಾವುದೇ ಕ್ರಮ ಕೈಗೊಳ್ಳದ ಕಾರಣ, ಲಕ್ಷ್ಮಿನಾರಾಯಣರೆಡ್ಡಿ ಅವರು ಕೃಷಿ ಇಲಾಖೆಯ ಕಚೇರಿ ಮುಂದೆ ತಮ್ಮ ಪೈಪುಗಳನ್ನು ಬಿಸಾಡಿ ಪ್ರತಿಭಟನೆ ನಡೆಸಿದರು.


“ನನಗೂ, ನನ್ನ ಕುಟುಂಬದ ಜಮೀನಿಗೂ ಹನಿ ನೀರಾವರಿಗಾಗಿ ಪಡೆದ ಪೈಪ್‌ಗಳು ತುಂಬಾ ಕಳಪೆಯಾಗಿವೆ. ಈ ಕುರಿತು ಅಧಿಕಾರಿಗಳು ನಿರ್ಲಕ್ಷ್ಯ ವಹಿಸುತ್ತಿದ್ದಾರೆ. ಕಳಪೆ ಪೈಪ್‌ಗಳ ಪೂರೈಕೆ ಬಗ್ಗೆ ತನಿಖೆಯಾಗುವವರೆಗೆ ನಾನು ಹಿಮ್ಮೆಟ್ಟುವುದಿಲ್ಲ. ಇದು ನನ್ನೊಬ್ಬನ ಸಮಸ್ಯೆಯಲ್ಲ, ಎಲ್ಲಾ ರೈತರ ಸಮಸ್ಯೆಯಾಗಿದೆ.”

ಕೆ. ಲಕ್ಷ್ಮಿನಾರಾಯಣರೆಡ್ಡಿ, ತಾಲ್ಲೂಕು ಪಂಚಾಯಿತಿ ಮಾಜಿ ಅಧ್ಯಕ್ಷ


“ಶಿಡ್ಲಘಟ್ಟ ತಾಲ್ಲೂಕಿನಲ್ಲಿ 28 ರೈತರಿಗೆ ಪ್ರೀಮಿಯರ್ ಕಂಪನಿಯ ಪೈಪ್‌ಗಳನ್ನು ವಿತರಿಸಲಾಗಿದೆ. ಈವರೆಗೆ ದೂರು ಬಂದಿಲ್ಲ, ಆದರೆ ಲಕ್ಷ್ಮಿನಾರಾಯಣರೆಡ್ಡಿ ಅವರ ತೋಟದಲ್ಲಿ ಪೈಪ್‌ಗಳು ಕಳಪೆಯಾಗಿರುವುದು ದೃಢವಾಗಿದೆ. ಪೂರೈಕೆದಾರ ಕಂಪನಿ ಬದಲಾಯಿಸಲು ಒಪ್ಪಿಕೊಂಡಿದೆ. ಈ ಬಗ್ಗೆ ಹಿರಿಯ ಅಧಿಕಾರಿಗಳಿಗೆ ವರದಿ ಸಲ್ಲಿಸಲಾಗುವುದು.”

ರವಿ, ಕೃಷಿ ಸಹಾಯಕ ನಿರ್ದೇಶಕ

Sidlaghatta WhatsApp Channel Group

For Daily Updates WhatsApp ‘HI’ to 7406303366

Be a reporter

ಊರಿನ ಸುದ್ದಿ, ಫೋಟೋ ಕಳುಹಿಸಿ.

Report an error in this story

ಇದನ್ನೂ ಓದಿ