Jangamakote, Sidlaghatta : ತಾಲ್ಲೂಕಿನ ಗ್ರಂಥಾಲಯಗಳು ಮತ್ತು ಕೂಸಿನ ಮನೆಗಳ ಭೇಟಿ ಪರಿಶೀಲನೆ ವೇಳೆ ತಾ.ಪಂ ಕಾರ್ಯನಿರ್ವಹಣಾಧಿಕಾರಿ (EO) ಹೇಮಾವತಿ ಅವರು, ಓದುಗರಿಗೆ ಶಾಂತಚಿತ್ತದಿಂದ ಓದಲು ಅನುಕೂಲವಾಗುವ ವಾತಾವರಣವನ್ನು ನಿರ್ಮಿಸುವುದು ಅತ್ಯವಶ್ಯಕ ಎಂದು ಹೇಳಿದ್ದಾರೆ.
ಭಕ್ತರಹಳ್ಳಿ, ಹೊಸಪೇಟೆ, ಕುಂಭಿಗಾನಹಳ್ಳಿ ಗ್ರಾಮ ಪಂಚಾಯತ್ ವ್ಯಾಪ್ತಿಯ ಡಿಜಿಟಲ್ ಗ್ರಂಥಾಲಯಗಳು ಮತ್ತು ಕೂಸಿನ ಮನೆಗಳಿಗೆ ಮಂಗಳವಾರ ಭೇಟಿ ನೀಡಿದ ಅವರು, ಗ್ರಂಥಾಲಯಗಳಲ್ಲಿ ಸ್ಪರ್ಧಾತ್ಮಕ ಪರೀಕ್ಷೆಗಳ ಮಾರ್ಗದರ್ಶಿಗಳು ಲಭ್ಯವಿರುವಂತೆ ಮಾಡಬೇಕು ಹಾಗೂ ಓದುಗರ ಓದು ಹವ್ಯಾಸವನ್ನು ಉತ್ತೇಜಿಸಲು ಅಗತ್ಯ ಸೌಲಭ್ಯಗಳನ್ನು ಒದಗಿಸಬೇಕು ಎಂದು ಅಧಿಕಾರಿಗಳಿಗೆ ಸೂಚನೆ ನೀಡಿದರು.
ಅದನ್ನು ಬಿಟ್ಟು, ಸ್ಥಳಾವಕಾಶವಿದ್ದಲ್ಲಿ ಗ್ರಂಥಾಲಯದ ಸುತ್ತಲೂ ಉದ್ಯಾನವನ ಮಾದರಿಯಲ್ಲಿ ಗಿಡಗಳನ್ನು ನೆಟ್ಟು ಪೋಷಿಸಬೇಕು ಎಂಬ ಸಲಹೆಯನ್ನೂ ನೀಡಿದ್ದಾರೆ. “ಜಿಲ್ಲಾ ಗ್ರಂಥಾಲಯದಿಂದ ಸಿಗುವ ಸವಲತ್ತುಗಳನ್ನು ಸದುಪಯೋಗಪಡಿಸಿಕೊಂಡು ಗ್ರಾಮೀಣ ಮಕ್ಕಳ ಓದು ಹವ್ಯಾಸ ಹೆಚ್ಚಿಸಬೇಕು” ಎಂದು ಅವರು ಒತ್ತಾಯಿಸಿದರು.
ಕೂಸಿನ ಮನೆಗಳ ಪರಿಶೀಲನೆ ವೇಳೆ, ಶೈಕ್ಷಣಿಕ ವಾತಾವರಣವನ್ನೂ ಸಮರ್ಪಕವಾಗಿ ಕಲ್ಪಿಸಬೇಕು. ಮಕ್ಕಳಿಗೆ ಆಟದ ಜತೆ ಪ್ರಾಥಮಿಕ ಶಿಕ್ಷಣ ನೀಡಬೇಕು, ಸೂಕ್ತ ದಾಖಲೆಗಳನ್ನು ನಿರ್ವಹಿಸಬೇಕು ಮತ್ತು ಶುದ್ಧತೆಯತ್ತ ಹೆಚ್ಚಿನ ಗಮನ ಕೊಡಬೇಕು ಎಂದು ಇಓ ಹೇಮಾವತಿ ತಿಳಿಸಿದರು.
ಈ ಸಂದರ್ಭ, ಹೊಸಪೇಟೆ ಪಿಡಿಓ ಯಮುನಾರಾಣಿ, ಕುಂಭಿಗಾನಹಳ್ಳಿ ಪಿಡಿಓ ಪ್ರಶಾಂತ್, ಮಳಮಾಚನಹಳ್ಳಿ ಪಿಡಿಓ ಶೈಲಾ, ಭಕ್ತರಹಳ್ಳಿ ಪಿಡಿಓ ಅಂಜನ್ ಕುಮಾರ್ ಹಾಗೂ ತಾ.ಪಂ ಐಇಸಿ ಸಂಯೋಜಕ ಲೋಕೇಶ್ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.
