Sidlaghatta, Chikkaballapur : ಶಿಡ್ಲಘಟ್ಟ ನಗರದ ಅಗ್ರಹಾರ ಬೀದಿಯಲ್ಲಿರುವ 350 ವರ್ಷಗಳ ಇತಿಹಾಸ ಹೊಂದಿರುವ ಶಾಮಣ್ಣ ಬಾವಿ, ಸ್ಥಳೀಯ ಯುವಕರ ಶ್ರಮದಾನದಿಂದ ಮತ್ತೆ ಜೀವಂತಗೊಂಡಿದೆ. ವರ್ಷಗಳ ಕಾಲ ನಿರ್ಲಕ್ಷ್ಯದಿಂದ ಕಳೆಗಿಡ ಮತ್ತು ತ್ಯಾಜ್ಯಗಳಿಂದ ತುಂಬಿಕೊಂಡಿದ್ದ ಈ ಪುರಾತನ ಬಾವಿಯನ್ನು ಯುವಕರು ಶ್ರಮದಾನ ಮಾಡಿ ಸ್ವಚ್ಛಗೊಳಿಸಿ ಪುನಃ ಸುಂದರವಾಗಿ ರೂಪಾಂತರಗೊಳಿಸಿದ್ದಾರೆ.
ಇತಿಹಾಸದ ಪ್ರಕಾರ, ಸುಮಾರು ಮೂರು ಶತಮಾನಗಳ ಹಿಂದೆ ಶಾಮಣ್ಣ ಎಂಬ ಧಾರ್ಮಿಕ ವ್ಯಕ್ತಿ ಇಲ್ಲಿ ಶ್ರೀಕಂಠೇಶ್ವರ ಮತ್ತು ಲಕ್ಷ್ಮೀನರಸಿಂಹಸ್ವಾಮಿ ದೇವಾಲಯದ ಸಮೀಪ ಚತುಷ್ಕೋನಾಕಾರದ ಕಲ್ಯಾಣಿ ನಿರ್ಮಿಸಿದ್ದರು. ಅಂದಿನಿಂದ ಇದು “ಶಾಮಣ್ಣ ಬಾವಿ” ಎಂಬ ಹೆಸರಿನಲ್ಲಿ ಜನಪ್ರಿಯವಾಯಿತು.
ಈ ಸ್ಥಳದ ವಿಶೇಷತೆ ಎಂದರೆ – ಶಿವ ಮತ್ತು ವಿಷ್ಣು ದೇವತೆಗಳು ಒಂದೇ ಪ್ರದೇಶದಲ್ಲಿ ಪೂಜಿತವಾಗಿರುವುದು. ಜೊತೆಗೆ ಪಾರ್ವತಿ, ಗಣೇಶ, ಸುಬ್ರಮಣ್ಯ, ಆಂಜನೇಯ, ಕೇದಾರೇಶ್ವರ ಮುಂತಾದ ದೇವತೆಗಳ ಸನ್ನಿಧಿಯೂ ಇಲ್ಲಿದೆ. ಅರಳಿ, ತೆಂಗು, ಹೊಂಗೆ, ಹುಣಸೆ ಮರಗಳಿಂದ ಆವರಿಸಿರುವ ಈ ಪ್ರದೇಶವು ಶಾಂತತೆಯ ತಾಣವಾಗಿತ್ತು.
ಒಮ್ಮೆ ನಗರ ಯುವಕರ ಈಜು ತರಬೇತಿ ಸ್ಥಳವಾಗಿದ್ದ ಶಾಮಣ್ಣ ಬಾವಿ, ಕಾಲಕ್ರಮೇಣ ನೀರಿನ ಕೊರತೆಯಿಂದ ಖಾಲಿಯಾಗಿತ್ತು. ತ್ಯಾಜ್ಯ, ಕಳೆಗಿಡಗಳು ತುಂಬಿಕೊಂಡು ಬಾವಿ ತನ್ನ ಇತಿಹಾಸದ ಮೆರಗನ್ನು ಕಳೆದುಕೊಂಡಿತ್ತು. ಆದರೆ ನಗರದ ಯುವಕರು ಬಾವಿಯ ಸಾಂಸ್ಕೃತಿಕ ಪರಂಪರೆಯನ್ನು ಉಳಿಸಬೇಕು ಎಂಬ ದೃಷ್ಟಿಯಿಂದ ಶ್ರಮದಾನ ಕೈಗೊಂಡು ಬಾವಿಯನ್ನು ಸ್ವಚ್ಛಗೊಳಿಸಿದ್ದಾರೆ.
“ನೀರಿನ ಮಟ್ಟ ಹೆಚ್ಚಿಸಲು ಮತ್ತು ಅಡಿಗಡಿತದ ಜಲಮಟ್ಟವನ್ನು ಕಾಪಾಡಲು ಬಾವಿಯನ್ನು ಸ್ವಚ್ಛಗೊಳಿಸಿದ್ದೇವೆ. ನಮ್ಮ ಹಿರಿಯರ ಅಮೂಲ್ಯ ಆಸ್ತಿಯನ್ನು ಸಂರಕ್ಷಿಸುವುದು ನಮ್ಮ ಜವಾಬ್ದಾರಿ,” ಎಂದು ಶ್ರಮದಾನದಲ್ಲಿ ಭಾಗವಹಿಸಿದ್ದ ಯುವಕರು ಹೇಳಿದರು.
ಶ್ರಮದಾನದಲ್ಲಿ ಸುದಾಕರ್, ಸೂರಿ, ವೆಂಕಟೇಶ್, ಮಂಜುಗೌಡ, ಮುರಳಿ, ಸೀನಪ್ಪ, ಶ್ರೀಧರ್ ಸೇರಿದಂತೆ ಹಲವಾರು ಯುವಕರು ಪಾಲ್ಗೊಂಡಿದ್ದರು.
