ತಾಲ್ಲೂಕಿನ ಗುಡಿಹಳ್ಳಿ ಗ್ರಾಮದಲ್ಲಿ ಮುಖ್ಯ ರಸ್ತೆಯಲ್ಲಿ ದೊಂಗರವು ಉಂಟಾಗಿದ್ದು, ಸರಿಪಡಿಸದಿರುವುದರಿಂದ ರಾತ್ರಿ ವೇಳೆ ಸಂಚರಿಸುವ ಪ್ರಯಾಣಿಕರಿಗೆ ಮೃತ್ಯುಕೂಪವಾಗಿ ಪರಿಣಮಿಸಿದೆ ಎಂದು ಗ್ರಾಮಸ್ಥರು ದೂರಿದ್ದಾರೆ.
ಅಬ್ಲೂಡಿನಿಂದ ಗುಡಿಹಳ್ಳಿಯ ಮೂಲಕ ಕಂಟಿಕನಹಳ್ಳಿ, ಅಂಗರೇಕಹಳ್ಳಿ, ಆವಲಹಳ್ಳಿ, ಅಣಕನೂರು ಮೂಲಕ ಚಿಕ್ಕಬಳ್ಳಾಪುರಕ್ಕೆ ಹೋಗುವ ದಾರಿಯಿದು. ಹಾಗಾಗಿ ಈ ರಸ್ತೆಯಲ್ಲಿ ವಾಹನ ಸಂಚಾರವಿರುತ್ತದೆ. ಶಾಲೆಗೆ ಹೋಗುವ ಮಕ್ಕಳು ಕೂಡ ಇದೇ ರಸ್ತೆಯಲ್ಲಿ ಪ್ರಯಾಣಿಸಬೇಕಿದೆ.
ಮೋರಿಯ ಕಲ್ಲು ಮುರಿದಿರುವ ಕಾರಣ ದೊಡ್ಡ ರಂಧ್ರವು ರಸ್ತೆಯಲ್ಲಿ ಮೂಡಿದೆ. ಗ್ರಾಮಸ್ಥರು ಈ ಭಾಗದಲ್ಲಿ ಸಂಚರಿಸುವವರು ಬೀಳದಿರಲೆಂದು ಒಂದು ಕೋಲನ್ನು ಸಿಕ್ಕಿಸಿ ಅದಕ್ಕೆ ಚೀಲವನ್ನು ಹೊದಿಸಿದ್ದಾರೆ. ಆದರೂ ಕತ್ತಲಿನಲ್ಲಿ ಅಪಾಯವೇ ಹೆಚ್ಚು. ಹಲವಾರು ವರ್ಷಗಳು ಕಳೆದರೂ ಈ ಬಗ್ಗೆ ಕ್ರಮ ಕೈಗೊಳ್ಳದಿರುವುದರ ಬಗ್ಗೆ ಗ್ರಾಮಸ್ಥರು ಬೇಸರ ವ್ಯಕ್ತಪಡಿಸುತ್ತಾರೆ. ತಕ್ಷಣ ಕ್ರಮ ಕೈಗೊಂಡು ಈ ಮೋರಿಯನ್ನು ದುರಸ್ಥಿ ಮಾಡಬೇಕೆಂದು ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.
