ಆಸ್ಟ್ರೇಲಿಯಾದೊಂದಿಗೆ ನಂಟು ಬೆಸೆದ ಗೊಂಬೆ ಹಬ್ಬ

ದಸರಾ ಗೊಂಬೆ ಹಬ್ಬ ಶಿಡ್ಲಘಟ್ಟ ತಾಲ್ಲೂಕಿನ ಮೇಲೂರು ಗ್ರಾಮವನ್ನು ದೂರದ ಆಸ್ಟ್ರೇಲಿಯಾದೊಂದಿಗೆ ಬೆಸೆದಿದೆ. ಆಸ್ಟ್ರೇಲಿಯಾದ ಮೆಲ್ಬೋರ್ನ್ ನಲ್ಲಿ ಗೊಂಬೆ ಜೋಡಿಸಿ ಪೂಜಿಸುವ ಮೂಲಕ ಮೇಲೂರಿನ ಹೆಣ್ಣುಮಗಳು ತವರಿನ ಸಂಸ್ಕೃತಿಯನ್ನು ಹಬ್ಬದ ಆಚರಣೆಯನ್ನು ದೇಶ, ಖಂಡದ ಆಚೆಗೂ ಕೊಂಡೊಯ್ದಿದ್ದಾರೆ.
ತಾಲ್ಲೂಕಿನ ಮೇಲೂರಿನ ಬಿ.ಎಂ.ಕೃಷ್ಣಮೂರ್ತಿ ರವರ ಮಗಳು ಸೌಭಾಗ್ಯಲಕ್ಷ್ಮಿಆನಂದ್ ರವರು ತಮ್ಮ ವಿವಾಹದ ನಂತರ ಆಸ್ಟ್ರೇಲಿಯಾದ ಮೆಲ್ಬೋರ್ನ್ ನಲ್ಲಿ ನೆಲೆನಿಂತರೂ ಹದಿನೇಳು ವರ್ಷಗಳಿಂದ ಗೊಂಬೆ ಜೋಡಿಸಿ ಅಲ್ಲಿನ ಸ್ಥಳೀಯ ಅನಿವಾಸಿ ಭಾರತೀಯರಿಗೆ ಆಹ್ವಾನವಿತ್ತು ಅವರೊಂದಿಗೆ ಹಬ್ಬದ ಆಚರಣೆ ನಡೆಸುತ್ತಾರೆ.
ಎಲ್ಲಾ ಗೊಂಬೆಗಳನ್ನ ತವರಿನಿಂದಲೇ ಖರೀದಿಸಿ ಕೊಂಡು ಹೋಗಿ ಜೋಡಿಸಿದ್ದರೆ, ಕೆಲವು ಗೊಂಬೆಗಳನ್ನ ಸ್ವತಃ ತಾವೇ ಮಾಡಿದ್ದಾರೆ, ದಶಾವತಾರ, ದತ್ತಾತ್ರೇಯ, ಸಿಂಡ್ರೆಲಾ, ಮೀರಾ, ಮುಂತಾದ ದೇವರ ಗೊಂಬೆಗಳನ್ನ ಖರೀದಿಸಿ ಜೋಡಿಸಿದ್ದರೆ ಬಾಸ್ಕೆಟ್ ಬಾಲ್ ಮ್ಯಾಚ್,
ಗಜೇಂದ್ರ ಮೋಕ್ಷ, ಗಣೇಶನಿಗೆ ಆನೆ ತಲೆ ಜೋಡಿಸುವ ಸನ್ನಿವೇಶ ಗಳನ್ನ ತಾವೇ ಸ್ವತಃ ಮಾಡಿ ಜೋಡಿಸಿದ್ದಾರೆ.
“ನಾವು ಮೇಲೂರಿನ ನಮ್ಮ ಮನೆಯಲ್ಲಿ ಮೂರು ತಲೆಮಾರುಗಳಿಂದ ಆಚರಿಸಿಕೊಂಡು ಬಂದ ಗೊಂಬೆ ಹಬ್ಬವು ಈ ವರ್ಷವೂ ಮುಂದುವರೆದಿದೆ. ಪಟ್ಟದಗೊಂಬೆಗಳು, ಮೂವತ್ತು ಬಗೆ ಗಣೇಶನ ಬೊಂಬೆಗಳು, ದವಸವನ್ನ ಎತ್ತಿನ ಗಾಡಿಯಲ್ಲಿ ಮಾರುಕಟ್ಟೆಗೆ ಸಾಗಿಸುವ ರೈತ ದಂಪತಿ, ತರಕಾರಿಯನ್ನ ತಲೆಮೇಲೆ ಸಾಗಿಸುವ ರೈತರು, ದಿನಸಿಯನ್ನ ಮಾರುತ್ತಿರುವ ಶೆಟ್ಟಿ ಅಂಗಡಿ, ಶ್ರೀರಾಮರಿಗೆ ಹಣ್ಣು ನೀಡುತ್ತಿರುವ ಶಬರಿ, ದೇವರ ಬೊಂಬೆಗಳು, ಮುಂತಾದ ಹತ್ತು ಹಲವು ಬೊಂಬೆಗಳು ನಮ್ಮಲ್ಲಿವೆ. ಮನೆಗೆ ಬಂದವರಿಗೆ ಹಬ್ಬದ ಸಿಹಿ ತಿಂಡಿ ನೀಡಿ ತಾಂಬೂಲದೊಂದಿಗೆ ಸತ್ಕರಿಸುವುದು ಸಂಪ್ರದಾಯ. ನನ್ನ ತಂಗಿ ಅಲ್ಲಿ ದೂರದ ಮೆಲ್ಬರ್ನ್ ನಗರದಲ್ಲಿ ಇಲ್ಲಿನಂತೆಯೇ ಗೊಂಬೆ ಹಬ್ಬ ಆಚರಿಸುವುದು ನಮಗೆಲ್ಲ ಹೆಮ್ಮೆ’ ಎನ್ನುತ್ತಾರೆ ಮೇಲೂರಿನ ಎಂ.ಕೆ.ರವಿಪ್ರಸಾದ್.