Sidlaghatta : ಅಂಗನವಾಡಿ ಕೇಂದ್ರವೆಂದರೆ ಕೇವಲ ಮಕ್ಕಳನ್ನು ನೋಡಿಕೊಳ್ಳುವ ಸ್ಥಳವಲ್ಲ; ಅವರ ಶಾಲಾ ಜೀವನದ ಮೊದಲ ಹೆಜ್ಜೆ. ಈ ಹಂತದಲ್ಲಿಯೇ ಮಕ್ಕಳಲ್ಲಿ ಕಲಿಕೆ, ಕಲ್ಪನೆ, ಪರಿಸರ ಪ್ರಜ್ಞೆ ಹಾಗೂ ದೇಶದ ಬಗ್ಗೆ ಅರಿವು ಮೂಡಿಸುವ ಉದ್ದೇಶದಿಂದ ಆನೂರು ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಬೋದಗೂರು ಗ್ರಾಮದಲ್ಲಿ ಅಂಗನವಾಡಿ ಕೇಂದ್ರವನ್ನು ವಿಶೇಷ ವಿನ್ಯಾಸದಲ್ಲಿ ರೂಪಿಸಲಾಗಿದೆ.
ನಿರ್ಮಾಣಕ್ಕೆ ಯಾವ ಅನುದಾನ ಬಳಸಲಾಗಿದೆ?
ಸುಮಾರು ₹35 ಲಕ್ಷ ವೆಚ್ಚದಲ್ಲಿ ನಿರ್ಮಾಣಗೊಂಡಿರುವ ಅಂಗನವಾಡಿ ಕೇಂದ್ರ ಹಾಗೂ ಅಡುಗೆ ಮನೆಗೆ ಮಹಾತ್ಮ ಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಯೋಜನೆ (NREGA), 15ನೇ ಹಣಕಾಸು ಆಯೋಗದ ಅನುದಾನ ಹಾಗೂ ಗ್ರಾಮ ಪಂಚಾಯಿತಿಯ ಸ್ವಂತ ನಿಧಿ ಬಳಸಲಾಗಿದೆ.
ಮಕ್ಕಳನ್ನು ಆಕರ್ಷಿಸುವ ರೀತಿಯಲ್ಲಿ ಕಟ್ಟಡದ ಒಳಾಂಗಣ ಮತ್ತು ಹೊರಾಂಗಣವನ್ನು ಕಲಾತ್ಮಕವಾಗಿ ರೂಪಿಸಲಾಗಿದೆ. ಗೋಡೆಗಳ ಮೇಲೆ ಹುಲಿ, ಆನೆ, ನವಿಲು ಹಾಗೂ ಹೂಗಳ ವರ್ಣರಂಜಿತ ಚಿತ್ರಗಳನ್ನು ಬಿಡಿಸಲಾಗಿದ್ದು, ಅವುಗಳ ಮೂಲಕ ಮಕ್ಕಳಿಗೆ ದೇಶದ ಪ್ರಾಣಿ, ಪಕ್ಷಿ, ಪ್ರಕೃತಿ ಮತ್ತು ಪರಿಸರದ ಕುರಿತು ಪರಿಚಯಿಸುವ ಪ್ರಯತ್ನ ಮಾಡಲಾಗಿದೆ. ಗ್ರಾಮೀಣ ಬದುಕಿನ ವಿವಿಧ ಆಯಾಮಗಳನ್ನು ಪರಿಚಯಿಸುವ ವರ್ಲಿ ಕಲಾ ವಿನ್ಯಾಸವೂ ಗೋಡೆಗಳಿಗೆ ವಿಶೇಷ ಮೆರುಗು ನೀಡಿದೆ.
ಗೋಡೆಗಳ ಮೂಲಕ ಮಕ್ಕಳು ಹೇಗೆ ಕಲಿಯುತ್ತಾರೆ?
ಸಾಮಾನ್ಯವಾಗಿ ಮಕ್ಕಳಿಗೆ ಪುಸ್ತಕ, ಚಿತ್ರ ಅಥವಾ ಮಾತಿನ ಮೂಲಕ ನೀಡುವ ಮಾಹಿತಿಯನ್ನು ಇಲ್ಲಿ ಗೋಡೆಗಳ ಮೇಲಿನ ಚಿತ್ರಗಳ ಮೂಲಕವೂ ಪರಿಚಯಿಸುವ ಉದ್ದೇಶ ಹೊಂದಲಾಗಿದೆ. ಬಣ್ಣಬಣ್ಣದ ಚಿತ್ರಗಳು ಮಕ್ಕಳ ಗಮನ ಸೆಳೆಯುವುದರ ಜತೆಗೆ, ದಿನನಿತ್ಯದ ವಾತಾವರಣದಲ್ಲಿಯೇ ಹೊಸ ವಿಷಯಗಳನ್ನು ಗಮನಿಸಿ ಕಲಿಯಲು ಅವಕಾಶ ಕಲ್ಪಿಸುತ್ತವೆ.
ಕೇಂದ್ರದ ವಿನ್ಯಾಸದಲ್ಲಿ ಸ್ಥಳೀಯ ಕಲಾ ಪರಂಪರೆಗೂ ಆದ್ಯತೆ ನೀಡಲಾಗಿದೆ. ವರ್ಲಿ ಕಲೆಯ ಮೂಲಕ ಗ್ರಾಮೀಣ ಜೀವನ, ಕೃಷಿ ಹಾಗೂ ಸಮುದಾಯ ಬದುಕಿನ ಚಿತ್ರಣವನ್ನು ಕಟ್ಟಿಕೊಡಲಾಗಿದೆ. ಇದರಿಂದ ಮಕ್ಕಳಿಗೆ ತಮ್ಮ ಸುತ್ತಲಿನ ಗ್ರಾಮೀಣ ಬದುಕಿನ ಪರಿಚಯವೂ ಆಗಲಿದೆ.
ಸೌರಶಕ್ತಿ, ತೊಟ್ಟಿ ಮನೆ ವಿನ್ಯಾಸ ಹೇಗಿದೆ?
ಕೇಂದ್ರದಲ್ಲಿ ವಿದ್ಯುತ್ ಬಳಕೆಯನ್ನು ಕಡಿಮೆ ಮಾಡುವ ಹಾಗೂ ಪರ್ಯಾಯ ಇಂಧನದ ಮಹತ್ವವನ್ನು ಪರಿಚಯಿಸುವ ನಿಟ್ಟಿನಲ್ಲಿ ಸೌರಶಕ್ತಿ ವ್ಯವಸ್ಥೆ ಅಳವಡಿಸಲಾಗಿದೆ. ಸೌರಶಕ್ತಿಯನ್ನು ಬಳಸಿ ದೀಪಗಳನ್ನು ಬೆಳಗಿಸುವ ವ್ಯವಸ್ಥೆ ಮಾಡಲಾಗಿದೆ.
ಸಾಂಪ್ರದಾಯಿಕ ವಾಸ್ತುಶೈಲಿಯ ಸ್ಪರ್ಶ ನೀಡುವ “ತೊಟ್ಟಿ ಮನೆ” ಪರಿಕಲ್ಪನೆಯನ್ನೂ ಕಟ್ಟಡದ ವಿನ್ಯಾಸದಲ್ಲಿ ಅಳವಡಿಸಲಾಗಿದೆ. ಮಕ್ಕಳಿಗೆ ಸುರಕ್ಷಿತ, ಆಹ್ಲಾದಕರ ಹಾಗೂ ಮುಕ್ತ ವಾತಾವರಣ ಕಲ್ಪಿಸುವ ಪ್ರಯತ್ನ ಮಾಡಲಾಗಿದೆ.
ಅಡುಗೆ ಮನೆಯಲ್ಲೂ ಸೌಲಭ್ಯ
ಅಂಗನವಾಡಿ ಮಕ್ಕಳಿಗೆ ಪೌಷ್ಟಿಕ ಆಹಾರ ತಯಾರಿಸುವ ಅಡುಗೆ ಮನೆಯನ್ನು ಸಹ ಅಗತ್ಯ ಸೌಲಭ್ಯಗಳೊಂದಿಗೆ ರೂಪಿಸಲಾಗಿದೆ. ಅಡುಗೆ ಸಾಮಗ್ರಿಗಳನ್ನು ವ್ಯವಸ್ಥಿತವಾಗಿ ಇರಿಸಿಕೊಳ್ಳಲು ವಾರ್ಡ್ರೋಬ್ ಸೇರಿದಂತೆ ಸಂಗ್ರಹ ವ್ಯವಸ್ಥೆ ಕಲ್ಪಿಸಲಾಗಿದೆ. ಸ್ವಚ್ಛತೆ ಮತ್ತು ಅಚ್ಚುಕಟ್ಟಿಗೆ ಒತ್ತು ನೀಡುವ ರೀತಿಯಲ್ಲಿ ಅಡುಗೆ ಕೋಣೆಯನ್ನು ಸಿದ್ಧಪಡಿಸಲಾಗಿದೆ.
“ಮಕ್ಕಳ ಶಾಲಾ ಹಂತ ಪ್ರಾರಂಭವಾಗುವುದೇ ಅಂಗನವಾಡಿ ಕೇಂದ್ರದಿಂದ. ಹೀಗಾಗಿ ಅವರಿಗೆ ಆರಂಭದಲ್ಲಿಯೇ ಉತ್ತಮ ವಾತಾವರಣ ಮತ್ತು ಸಾಧ್ಯವಾದಷ್ಟು ಉತ್ತಮ ಸೌಲಭ್ಯ ಒದಗಿಸಬೇಕು ಎಂಬ ಉದ್ದೇಶದಿಂದ ಕೇಂದ್ರವನ್ನು ವಿಶೇಷವಾಗಿ ರೂಪಿಸಲಾಗಿದೆ,” ಎಂದು ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿ ಕಾತ್ಯಾಯಿನಿ ಹೇಳುತ್ತಾರೆ.
ಈ ಕಾರ್ಯಕ್ಕೆ ಗ್ರಾಮ ಪಂಚಾಯಿತಿ ಮಾಜಿ ಉಪಾಧ್ಯಕ್ಷ ಬಿ.ಎನ್.ವಿಶ್ವಾಸ್, ಸದಸ್ಯೆ ಅರುಣ ಸುರೇಶ್, NREGA ಸಹಾಯಕ ನಿರ್ದೇಶಕ ಚಂದ್ರಪ್ಪ ಮತ್ತು ತಾಲ್ಲೂಕು ಪಂಚಾಯಿತಿ ಕಾರ್ಯನಿರ್ವಾಹಕ ಅಧಿಕಾರಿ ಹೇಮಾವತಿ ಅವರ ಸಹಕಾರವೂ ದೊರೆತಿದೆ ಎಂದು ಅವರು ತಿಳಿಸಿದ್ದಾರೆ.
ಕೇಂದ್ರದ ಗೋಡೆಗಳಿಗೆ ಜೀವ ತುಂಬಿದ ಕಲಾಕೃತಿಗಳನ್ನು ಕಲಾವಿದ ವಿಜಯ್ ರಚಿಸಿದ್ದಾರೆ. ಮಕ್ಕಳ ಮನಸ್ಸಿಗೆ ಹತ್ತಿರವಾಗುವ ಬಣ್ಣಗಳು, ಪ್ರಾಣಿ–ಪಕ್ಷಿಗಳ ಚಿತ್ರಗಳು ಮತ್ತು ಗ್ರಾಮೀಣ ಕಲಾ ವಿನ್ಯಾಸಗಳ ಮೂಲಕ ಕಟ್ಟಡಕ್ಕೆ ವಿಭಿನ್ನ ಸ್ವರೂಪ ನೀಡಲಾಗಿದೆ.
ಅಂಗನವಾಡಿ ಕೇಂದ್ರವನ್ನು “ಕಟ್ಟಡ”ವಾಗಿ ಮಾತ್ರವಲ್ಲದೆ, ಮಕ್ಕಳಿಗೆ ಆಟ, ಕಲಿಕೆ, ಪ್ರಕೃತಿ ಮತ್ತು ನಮ್ಮ ಸಂಸ್ಕೃತಿಯನ್ನು ಪರಿಚಯಿಸುವ ಮೊದಲ ಕಲಿಕಾ ಪರಿಸರವಾಗಿ ರೂಪಿಸಿರುವುದು ಬೋದಗೂರಿನ ಈ ಪ್ರಯತ್ನದ ವಿಶೇಷತೆ.
ಮಕ್ಕಳ ಪೌಷ್ಟಿಕತೆ ಕುರಿತು ಮಕ್ಕಳ ಬೆಳವಣಿಗೆಗೆ ಪೌಷ್ಟಿಕ ಆಹಾರ ಅತ್ಯಗತ್ಯ: ನ್ಯಾಯಾಧೀಶ ಮೊಹಮದ್ ರೋಷನ್ ಷಾ ಹಾಗೂ ಅಂಗನವಾಡಿ ಕೇಂದ್ರಗಳ ಪೋಷಣ್ ಮಾಸಾಚರಣೆ ಕುರಿತು ಅಂಗನವಾಡಿ ಕೇಂದ್ರಗಳಲ್ಲಿ ಗರ್ಭಿಣಿಯರಿಗೆ ಮತ್ತು ಮಕ್ಕಳಿಗೆ ಪೌಷ್ಟಿಕ ಆಹಾರ ವರದಿಗಳನ್ನೂ ಓದಿ.
In English: A specially designed anganwadi centre has been built at Bodaguru village under Anur Gram Panchayat in Sidlaghatta taluk at a cost of about ₹35 lakh, using funds from MGNREGA (Mahatma Gandhi National Rural Employment Guarantee Scheme), the 15th Finance Commission grant and the gram panchayat’s own funds. Its walls carry colourful paintings of tigers, elephants, peacocks and flowers along with Warli art depicting rural life, farming and community living, meant to help young children learn about animals, nature and village life from their surroundings. The centre has solar-powered lighting, a design inspired by the traditional ‘thotti mane’ courtyard house, and a kitchen with storage for preparing nutritious food. Panchayat Development Officer Katyayini said the centre was designed specially because a child’s schooling begins at the anganwadi, and credited support from former GP vice-president B.N. Vishwas, member Aruna Suresh, NREGA assistant director Chandrappa and Taluk Panchayat EO Hemavathi. The artwork was done by artist Vijay.
