Sidlaghatta : ಶಿಡ್ಲಘಟ್ಟ ತಾಲ್ಲೂಕಿನ ಗೌಡನಹಳ್ಳಿ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ಶಿಕ್ಷಕರು, SDMC, ಪೋಷಕರು ಹಾಗೂ ದಾನಿಗಳ ಸಹಕಾರದಿಂದ ಮಕ್ಕಳ ದಾಖಲಾತಿ ವರ್ಷದಿಂದ ವರ್ಷಕ್ಕೆ ಹೆಚ್ಚುತ್ತಿದೆ. 2019–20ನೇ ಸಾಲಿನಲ್ಲಿ 82 ಇದ್ದ ದಾಖಲಾತಿ, ಪ್ರಸಕ್ತ 2026–27ನೇ ಸಾಲಿನಲ್ಲಿ 228ಕ್ಕೆ ಏರಿಕೆಯಾಗಿದೆ.
ಮಕ್ಕಳು ಶಾಲೆಗೆ ಹೇಗೆ ಬರುತ್ತಿದ್ದಾರೆ?
ಸುತ್ತಮುತ್ತಲಿನ ಸುಮಾರು 20 ಗ್ರಾಮಗಳ 180 ಮಕ್ಕಳು ಎರಡು ಮಾರ್ಗಗಳ ಬಸ್ ಗಳಲ್ಲಿ ಶಾಲೆಗೆ ಬರುತ್ತಿದ್ದಾರೆ. 2021ಕ್ಕೂ ಮೊದಲು ಮಕ್ಕಳನ್ನು ಗೂಡ್ಸ್ ವಾಹನದಲ್ಲಿ ಕರೆತರಲಾಗುತ್ತಿತ್ತು. ಮಕ್ಕಳ ಸುರಕ್ಷತೆ ಹಾಗೂ ಸಾರಿಗೆ ಸೌಲಭ್ಯದ ಅಗತ್ಯ ಮನಗಂಡ ಸಹಶಿಕ್ಷಕ ವಿ.ಎಂ. ಮಂಜುನಾಥ್ ಅವರ ಪ್ರಯತ್ನದಿಂದ, ಗೌಡನಹಳ್ಳಿ ಮಂಜುನಾಥ್ ಹಾಗೂ ಎಸ್.ಎನ್. ಕ್ರಿಯಾ ಟ್ರಸ್ಟ್ ಅಧ್ಯಕ್ಷ ಆಂಜಿನಪ್ಪ (ಪುಟ್ಟು) ಅವರ ಸಹಕಾರದಲ್ಲಿ 2022–23ನೇ ಸಾಲಿನಲ್ಲಿ ₹5 ಲಕ್ಷ ಮೌಲ್ಯದ 35 ಆಸನಗಳ ಸೆಕೆಂಡ್ ಹ್ಯಾಂಡ್ ಬಸ್ ಒದಗಿಸಲಾಯಿತು.
ದಾಖಲಾತಿ ಹೆಚ್ಚಿದ ಹಿನ್ನೆಲೆಯಲ್ಲಿ ₹26 ಲಕ್ಷ ಮೌಲ್ಯದ 52 ಆಸನಗಳ ಹೊಸ ಐಶರ್ ಬಸ್ ನ್ನು ಗೌಡನಹಳ್ಳಿ ಮಂಜುನಾಥ್ ಹಾಗೂ ಎಸ್.ಎನ್. ಕ್ರಿಯಾ ಟ್ರಸ್ಟ್ ಅಧ್ಯಕ್ಷ ಆಂಜಿನಪ್ಪ (ಪುಟ್ಟು) ಕೊಡಿಸಿದ್ದು, ಗಾಂಧಿ ಜಯಂತಿಯಂದು ಹಸ್ತಾಂತರಿಸಲಾಗಿದೆ. ಶಿಕ್ಷಣ ಇಲಾಖೆಯ ಅಧಿಕಾರಿಗಳು ಹಾಗೂ ಜಿಲ್ಲಾಧಿಕಾರಿ ಸಹಕಾರದೊಂದಿಗೆ MOU ಪ್ರಕ್ರಿಯೆಯನ್ನೂ ಪೂರ್ಣಗೊಳಿಸಲಾಗಿದೆ. ಬಸ್ ನಿರ್ವಹಣೆಗಾಗಿ ಸಮಿತಿ ರಚಿಸಲಾಗಿದೆ.
LKG, UKG ತರಗತಿಗಳು ಯಾವಾಗ ಆರಂಭ?
ಶಾಲೆಯಲ್ಲಿ 2022–23ನೇ ಸಾಲಿನಲ್ಲಿ LKG, UKG ತರಗತಿಗಳನ್ನು ಆರಂಭಿಸಲಾಗಿದ್ದು, ಆರಂಭದಲ್ಲಿ SDMC ಮತ್ತು ಪೋಷಕರ ಸಹಕಾರದಿಂದ ನಡೆಸಲಾಯಿತು. ಗೌಡನಹಳ್ಳಿ ಮಂಜುನಾಥ್ ಅವರು ಶಿಕ್ಷಕಿ ಹಾಗೂ ಆಯಾಗೆ ಗೌರವಧನ ನೀಡಿದ್ದರು. 2024–25ರಿಂದ ಇಲಾಖೆಯ ಅನುಮೋದನೆಯೊಂದಿಗೆ ಅನುದಾನ ಹಾಗೂ ವೇತನ ದೊರೆಯುತ್ತಿದೆ.
ಮಕ್ಕಳು ಕ್ರೀಡಾಕೂಟ, ಪ್ರತಿಭಾಕಾರಂಜಿ ಹಾಗೂ ಸ್ಪರ್ಧಾತ್ಮಕ ಪರೀಕ್ಷೆಗಳಲ್ಲಿ ಭಾಗವಹಿಸುತ್ತಿದ್ದಾರೆ. 2023–24ನೇ ಸಾಲಿನಲ್ಲಿ ಶಾಲೆಯ SDMCಗೆ “ಪುಷ್ಟಿ” ಪ್ರಶಸ್ತಿ ದೊರೆತಿದೆ.
ಮುಖ್ಯಶಿಕ್ಷಕ ದೇವರಾಜ ಎಂ. ನೇತೃತ್ವದಲ್ಲಿ ಶಿಕ್ಷಕರು, ಸಿಬ್ಬಂದಿ, SDMC ಅಧ್ಯಕ್ಷ ವೆಂಕಟರೆಡ್ಡಿ, ಸದಸ್ಯರು, ಪೋಷಕರು ಹಾಗೂ ಹಳೇ ವಿದ್ಯಾರ್ಥಿಗಳ ಸಂಘದ ಚಂದ್ರು ಮತ್ತು ತಂಡ ಶಾಲೆಯ ಅಭಿವೃದ್ಧಿಗೆ ಸಹಕರಿಸುತ್ತಿದ್ದಾರೆ. ಸಾರಿಗೆ ಸೌಲಭ್ಯ ಹಾಗೂ ಸಮುದಾಯದ ಸಹಭಾಗಿತ್ವವು ಶಾಲೆಯ ದಾಖಲಾತಿ ಹೆಚ್ಚಳಕ್ಕೆ ಪೂರಕವಾಗಿದೆ.
In English: Enrolment at the Government Higher Primary School in Gowdanahalli, Sidlaghatta taluk, has risen from 82 in 2019–20 to 228 in 2026–27, with about 180 children from roughly 20 villages arriving by two bus routes. A new 52-seat Eicher bus worth ₹26 lakh, donated by Gowdanahalli Manjunath and S.N. Kriya Trust president Anjinappa (Puttu), was handed over on Gandhi Jayanti, after a second-hand 35-seat bus was provided in 2022–23. The MOU process was completed and a committee formed for bus maintenance; SDMC stands for School Development and Monitoring Committee.
