ಕಾರ್ತಿಕ ಮಾಸದ ಮೊದಲ ಸೋಮವಾರ: ಸೋಮೇಶ್ವರನಿಗೆ ರುದ್ರಾಭಿಷೇಕ; 23ರಂದು ಗಿರಿಜಾ ಕಲ್ಯಾಣೋತ್ಸವಕ್ಕೆ ಹೆಸರು ನೋಂದಣಿ

Sidlaghatta : ಕಾರ್ತಿಕ ಮಾಸದ ಮೊದಲ ಸೋಮವಾರದ ಅಂಗವಾಗಿ ತಾಲ್ಲೂಕಿನ ವಿವಿಧ ದೇವಾಲಯಗಳಲ್ಲಿ ಸೋಮವಾರ ವಿಶೇಷ ಪೂಜೆ, ಅಭಿಷೇಕ ಹಾಗೂ ದೀಪಾರಾಧನೆ ಭಕ್ತಿಭಾವದಿಂದ ನಡೆದವು.
ಸೋಮೇಶ್ವರ ದೇವಾಲಯದಲ್ಲಿ ಅಭಿಷೇಕ, ಅಲಂಕಾರ
ನಗರದ ಕೋಟೆ ವೃತ್ತದ ಸಮೀಪದ ಪ್ರಸನ್ನ ಕೋಟೆ ಶ್ರೀ ಸೋಮೇಶ್ವರ ಸ್ವಾಮಿ ದೇವಾಲಯಕ್ಕೆ ಬೆಳಿಗ್ಗೆಯಿಂದಲೇ ಭಕ್ತರು ಬರುತ್ತಿದ್ದರು. ಸ್ವಾಮಿಗೆ ಪಂಚಾಮೃತ ಅಭಿಷೇಕ, ರುದ್ರಾಭಿಷೇಕ ನೆರವೇರಿಸಿ ವಿಶೇಷ ಹೂವಿನ ಅಲಂಕಾರ ಮಾಡಲಾಯಿತು. ಮಧ್ಯಾಹ್ನ 12 ಗಂಟೆಗೆ ಮಹಾಮಂಗಳಾರತಿ ನಡೆದು ಭಕ್ತರಿಗೆ ತೀರ್ಥ ಪ್ರಸಾದ ವಿತರಿಸಲಾಯಿತು.
ಸುಮಂಗಲಿಯರಿಂದ ದೀಪಾರಾಧನೆ
ದೇವಾಲಯದ ಆವರಣದಲ್ಲಿ ಸುಮಂಗಲಿಯರು ದೀಪ ಬೆಳಗಿಸಿ ಪೂಜೆ ಸಲ್ಲಿಸಿದರು. ಕುಟುಂಬದ ಒಳಿತು ಹಾಗೂ ಇಷ್ಟಾರ್ಥ ಸಿದ್ಧಿಗಾಗಿ ಭಕ್ತರು ದೀಪಾರಾಧನೆಯಲ್ಲಿ ಪಾಲ್ಗೊಂಡರು; ಸಂಜೆಯೂ ಹಲವರು ಬಂದು ದೀಪ ಬೆಳಗಿ ಪ್ರಾರ್ಥಿಸಿದರು. ಮೊದಲ ಸೋಮವಾರದ ಪ್ರಯುಕ್ತ ವಿಶೇಷ ಅಭಿಷೇಕ, ಅಲಂಕಾರ ಹಾಗೂ ಮಹಾಮಂಗಳಾರತಿ ನೆರವೇರಿಸಲಾಗಿದ್ದು, ಬೆಳಿಗ್ಗೆಯಿಂದಲೇ ಸುಮಂಗಲಿಯರು ದೀಪ ಬೆಳಗಿಸುತ್ತಿದ್ದಾರೆ ಎಂದು ದೇವಾಲಯದ ಅರ್ಚಕ ಸಾಯೀಶ ತಿಳಿಸಿದರು.
ನವೆಂಬರ್ 23ರಂದು ವಾರ್ಷಿಕೋತ್ಸವ, ಗಿರಿಜಾ ಕಲ್ಯಾಣೋತ್ಸವ
ಕಳೆದ ವರ್ಷ ಜೀರ್ಣೋದ್ಧಾರಗೊಂಡು ಪುನರ್ ಪ್ರತಿಷ್ಠಾಪನೆಯಾದ ಈ ದೇವಾಲಯದ ಮೊದಲ ವರ್ಷದ ವಾರ್ಷಿಕೋತ್ಸವವನ್ನು ಎರಡನೇ ಕಾರ್ತಿಕ ಸೋಮವಾರವಾದ ನವೆಂಬರ್ 23ರಂದು ಆಯೋಜಿಸಲಾಗಿದೆ. ಅಂದು ಮುಂಜಾನೆ ಸ್ವಾಮಿಗೆ ವಿಶೇಷ ಅಭಿಷೇಕ ಹಾಗೂ ಹೂವಿನ ಅಲಂಕಾರ ನಡೆಯಲಿದೆ.
ಬೆಳಿಗ್ಗೆ 9.30ಕ್ಕೆ ದೇವಾಲಯದ ಆವರಣದಲ್ಲಿ ಸಾಮೂಹಿಕ ಗಿರಿಜಾ ಕಲ್ಯಾಣೋತ್ಸವ ನಡೆಯಲಿದ್ದು, ಪಾಲ್ಗೊಳ್ಳಲು ಇಚ್ಛಿಸುವ ಭಕ್ತರು ದೇವಾಲಯಕ್ಕೆ ಭೇಟಿ ನೀಡಿ ಹೆಸರು ನೋಂದಾಯಿಸಬಹುದು. ಸಂಜೆ ಸಂಗೀತೋತ್ಸವ ಕಾರ್ಯಕ್ರಮವೂ ಇದೆ ಎಂದು ಅರ್ಚಕ ಸಾಯೀಶ ತಿಳಿಸಿದರು.
ತಾಲ್ಲೂಕಿನ ಇತರೆ ಶಿವ ದೇವಾಲಯಗಳಲ್ಲಿಯೂ ವಿಶೇಷ ಪೂಜೆ, ಅಭಿಷೇಕ ಹಾಗೂ ದೀಪಾರಾಧನೆ ನಡೆದಿದ್ದು, ಭಕ್ತರು ಕುಟುಂಬ ಸಮೇತರಾಗಿ ಬಂದು ಪಾಲ್ಗೊಂಡರು.
ಸಂಬಂಧಿತ ಸುದ್ದಿ: ಸೋಮೇಶ್ವರ ದೇವಾಲಯದಲ್ಲಿ ಸ್ಕಂದ ಷಷ್ಠಿ ವಿಶೇಷ ಪೂಜೆ | ಸೋಮೇಶ್ವರ ದೇವಾಲಯದಲ್ಲಿ ನವರಾತ್ರಿ ಭರತನಾಟ್ಯ ಕಾರ್ಯಕ್ರಮ

For Daily Updates WhatsApp ‘HI’ to 7406303366
Summary in English
On the first Monday of Karthika month, special pujas, abhisheka and lamp-lighting (deepaaradhane) were held at temples across the taluk. At the Prasanna Kote Sri Someshwara Swamy temple near Kote Circle, the deity received panchamrita abhisheka and rudrabhisheka with a special flower decoration, followed by maha mangalarati at noon and distribution of theertha prasada. Married women lit lamps in the temple premises through the day, and priest Sayeesha said special rituals were performed for the first Monday. The temple, renovated and re-consecrated last year, will mark its first anniversary on the second Karthika Monday, 23 November, with special abhisheka, a mass Girija Kalyanotsava at 9.30 am (devotees can register their names at the temple) and a music programme in the evening.
Be a reporter
ಊರಿನ ಸುದ್ದಿ, ಫೋಟೋ ಕಳುಹಿಸಿ.
Send news


