ಜಯಂತಿಗ್ರಾಮದ ಮೊದಲ ದೇವಾಲಯ ಪೂಜಾಪ್ರತಿಷ್ಠಾಪನಾ ಕಾರ್ಯಕ್ರಮ

ತಾಲ್ಲೂಕಿನ ಅಬ್ಲೂಡು ಗ್ರಾಮ ಪಂಚಾಯತಿಯ ಜಯಂತಿಗ್ರಾಮದಲ್ಲಿ ಏಕೈಕ ಮತ್ತು ಮೊಟ್ಟಮೊದಲ ದೇವಾಲಯವಾದ ಓಂಕಾರ ಮಹಾಗಣಪತಿ ದೇವಾಲಯದ ಪೂಜಾಪ್ರತಿಷ್ಠಾಪನಾ ಕಾರ್ಯಕ್ರಮವನ್ನು ಗುರುವಾರ ನೆರವೇರಿಸಲಾಯಿತು.
ತಾಲ್ಲೂಕಿನ ದ್ಯಾವಪ್ಪನಗುಡಿ ಇತಿಹಾಸ ಪ್ರಸಿದ್ಧವಾಗಿದ್ದು, ದ್ಯಾವಪ್ಪ ತಾತನ ಸೇವೆಗಾಗಿ ತಾಲ್ಲೂಕು, ಜಿಲ್ಲೆ ಹಾಗೂ ಸುತ್ತಮುತ್ತಲಿನ ಜಿಲ್ಲೆಗಳಿಂದೆಲ್ಲಾ ಭಕ್ತರು ಆಗಮಿಸುತ್ತಾರೆ. ಈ ಪ್ರದೇಶದಲ್ಲಿ ಜನರು ಬಂದು ನೆಲೆಸುತ್ತಾ ಗ್ರಾಮ ಬೆಳೆದು ಜನರ ಬಾಯಲ್ಲಿ ದೇವರಾಜಪುರ ಎಂದು ಕೆರಸಿಕೊಂಡರೂ 1978 ರಲ್ಲಿ ಸರ್ಕಾರಿ ದಾಖಲೆಯಲ್ಲಿ ಜಯಂತಿ ಗ್ರಾಮ ಎಂದು ಹೆಸರಾಯಿತು. ಗ್ರಾಮದಲ್ಲಿನ ದೇವಾಲಯ ಇರದಿರುವುದರಿಂದ ಗ್ರಾಮಸ್ಥರು ಒಗ್ಗೂಡಿ ಓಂಕಾರ ಮಹಾಗಣಪತಿ ದೇವಾಲಯ ನಿರ್ಮಿಸಿಕೊಂಡಿದ್ದು ಪೂಜಾಪ್ರತಿಷ್ಠಾಪನೆ ಹಮ್ಮಿಕೊಂಡಿದ್ದರು. ಈ ಸಂದರ್ಭದಲ್ಲಿ ಹೋಮ, ಹವನ, ಅಭಿಷೇಕ, ದೇವರಿಗೆ ವಿಶೇಷ ಅಲಂಕಾರ, ಪ್ರಸಾದ ವಿನಿಯೋಗ ಹಾಗೂ ಅನ್ನಸಂತರ್ಪಣೆ ಏರ್ಪಡಿಸಲಾಗಿತ್ತು.
ದೊಡ್ಡಚನ್ನೇಗೌಡ, ನಾಗರಾಜ್‌, ದೇವರಾಜ್‌, ಅಶ್ವತ್ಥ, ನಾಗಭೂಷಣ್‌, ಕೇಶವಪ್ಪ, ಬೈರೇಗೌಡ, ಪ್ರಕಾಶ್‌, ಅರ್ಚಕರಾದ ಮಲ್ಲಿಕಾರ್ಜುನ್‌, ವಿಶ್ವನಾಥ್‌ ಹಾಜರಿದ್ದರು.